इजरायलबाट नेपालीहरुको उद्धार शुरु, शुक्रवार २५४ जना नेपाली स्वदेश फर्किए

राष्ट्रिय समाचार

Home
राष्ट्रिय समाचार
इजरायलबाट नेपालीहरुको उद्धार शुरु, शुक्रवार २५४ जना नेपाली स्वदेश फर्किए

इजरायलबाट नेपालीहरुको उद्धार शुरु, शुक्रवार २५४ जना नेपाली स्वदेश फर्किए

इजरायलमा रहेका २ सय ५४ जना नेपाली शुक्रवार बिहान स्वदेश आइपुगेका छन् । सरकारले उनीहरुलाई नेपाल एअरलाइन्सको विमानबाट स्वदेश ल्याएको हो ।

उनीहरुलाई लिन परराष्ट्रमन्त्री एनपी साउदलगायत सरकारी अधिकारी इजरायल पुगेका थिए । उद्धारका लागि बिहीवार बिहान दुबई हुँदै गएको नेपाल एअरलाइन्सको विमान इजरायलको तेलअभिभ पुगेको थियो ।

स्वदेश फिर्ता भएसँगै त्रिभुवन अन्तर्राष्ट्रिय विमानस्थलमा परराष्ट्रमन्त्री एनपी साउदले आवश्यकता अनुसार अरू नेपालीलाई पनि स्वदेशमा फिर्ता ल्याउन सरकारले पहल गर्ने बताउनुभयो । बाँकी रहेका अरुलाई नियमित उडान मार्फत् ल्याउने सरकारको तयारी रहेको छ।

पहिलो लटमा स्वदेश फिर्ता हुने टोलीमा हमासको आक्रमणबाट जोगिएका विरेन्द्र चौधरी, प्रमोद केसी र धनबहादुर चौधरी पनि हुनु हुन्छ । उहाँहरु मध्ये धनबहादुर चौधरी आक्रमणबाट घाइते भएका व्यक्ति हुनुहुन्छ । उपचारकै क्रममा रहेका उहाँलाई ट्राभल गर्न सक्ने चिकित्सकहरूले बताएपछि स्वदेश ल्याइएको हो ।

आक्रमणमा परी घाइते भएका प्रविन डाँगी, विधान सेजुवाल र हिमाञ्चल कट्टेलको भने इजरायलमै उपचार चलिरहेको छ । आक्रमणमा परेका विपिन जोशी अझै बेपत्ता छन् । १७ जनाको समूहमा भएको आक्रमणमा परी १० जना नेपालीको मृत्यु भएको थियो भने शव ल्याउने प्रक्रिया जारी रहेको परराष्ट्र मन्त्रालयले जनाएको छ ।

प्रकाशित मिति: शुक्रबार, असोज २६, २०८० ०६:०८

प्रतिक्रिया दिनुहोस्