नवलपरासी । प्रजनन स्वास्थ्य महिलाको मात्र विषय नभई पुरुषको पनि समान जिम्मेवारी र सक्रिय सहभागिता आवश्यक रहेकोमा जोड दिइएको छ । नवलपरासीका सातवटै स्थानीय तहका मुस्लिम समुदायका मौलाना तथा धर्मगुरुहरूको सहभागितामा आज सुनवलमा आयोजित ‘प्रजनन स्वास्थ्यमा पुरुषको भूमिका’ विषयक अन्तरक्रिया कार्यक्रममा यस्तो जोड दिइएको हो ।
कार्यक्रममा श्रीमती वा साथीको स्वास्थ्यप्रति चासो राख्ने, नियमित स्वास्थ्य परीक्षणका लागि प्रोत्साहित गर्ने तथा परिवार नियोजनमा दुवैले संयुक्त रूपमा निर्णय गर्नुपर्ने विषयमा छलफल गरिएको थियो। गर्भनिरोधका साधनको जिम्मेवार प्रयोग, कन्डमको सही र नियमित प्रयोग तथा यौनरोगबाट बच्न अपनाउनुपर्ने सावधानीबारे पनि जानकारी गराइएको थियो।
त्यस्तै, गर्भावस्था, सुत्केरी तथा प्रसूतिको समयमा महिलालाई भावनात्मक, आर्थिक र व्यवहारिक सहयोग गर्नुपर्ने, सन्तानको संख्या र जन्मान्तरबारे दुवैको सहमतिमा निर्णय गर्नुपर्ने र बाँझोपनको समस्या देखिएमा महिलालाई मात्र दोष नदिई महिला र पुरुष दुवैको स्वास्थ्य परीक्षण गर्नुपर्नेमा जोड दिइएको थियो ।
कार्यक्रममा यौन हिंसा, जबर्जस्ती यौनसम्पर्क र बालविवाहको अन्त्यका लागि पुरुषहरूले सक्रिय भूमिका निर्वाह गर्नुपर्ने तथा किशोर–किशोरीलाई यौन तथा प्रजनन स्वास्थ्यसम्बन्धी सही र वैज्ञानिक जानकारी दिन सहयोग गर्नुपर्ने विषयमा समेत छलफल भएको थियो।
प्रजनन स्वास्थ्यसम्बन्धी समस्या देखिएमा लुकाउने वा घरेलु उपचारमा मात्र निर्भर नभई समयमै स्वास्थ्य संस्थामा पुग्नुपर्ने तथा मदिरा, सुर्तीजन्य पदार्थलगायत जोखिमपूर्ण व्यवहार कम गर्नुपर्ने विषयमा पनि सहभागीहरूलाई जानकारी गराइएको थियो।
कालिका स्वावलम्बन विकास केन्द्र कपिलवस्तुका अध्यक्ष मन्दिप सिंहको अध्यक्षतामा भएको कार्यक्रममा २५ जना मौलानाको सहभागिता रहेको थियो। कार्यक्रममा स्वास्थ्य कार्यालय कपिलवस्तुकी जनस्वास्थ्य अधिकृत मधु चौधरी, मौलाना नियाज अन्सारी र अभिनव चौधरीले सहजीकरण गर्नुभएको संसारा परियोजना नवलपरासीकी संयोजक तीलु श्रेष्ठले नेपाली चेली अनलाइनलाइ जानकारी दिनुभयो ।
