आज शहीद दिवस, राष्ट्रिय पर्वका रुपमा मनाइँदै, नवलपरासीमा पनि शहीदको संझनामा विविध कार्यक्रम

राष्ट्रिय समाचार

Home
राष्ट्रिय समाचार
आज शहीद दिवस, राष्ट्रिय पर्वका रुपमा मनाइँदै, नवलपरासीमा पनि शहीदको संझनामा विविध कार्यक्रम

आज शहीद दिवस, राष्ट्रिय पर्वका रुपमा मनाइँदै, नवलपरासीमा पनि शहीदको संझनामा विविध कार्यक्रम

परासी । आज देशभर शहीद दिवस मनाइँदैछ । नागरिकको हित र अधिकारका लागि जीवन त्याग गरेका शहीदको सम्झनामा हरेक वर्ष माघ १६ मा विभिन्न कार्यक्रम गरी शहीद दिवस मनाउने गरिन्छ। नवलपरासीमा पनि विभिन्न कार्त्रक्रम गरी शहीद दिवस मनाइदै छ ।

प्रजातन्त्र स्थापना तथा विभिन्न कालखण्डमा स्वतन्त्रताका लागि जीवन उत्सर्ग गरेका शहीदहरुको सम्झनामा देशभर कार्यक्रम गरी शहीद दिवस मनाउन गरिन्छ । आजको दिन शहीद शुक्रराज शास्त्री, धर्मभक्त माथेमा, दशरथ चन्द र गङ्गालाल श्रेष्ठ तथा प्रजातान्त्रिक आन्दोलनका अन्य शहीदको योगदानलाई स्मरण गर्ने प्रचलन छ ।

राणा शासनको विरोध गर्दा वि.सं. १९९७ सालमा शहीद शुक्रराज शास्त्रीलाई माघ १० गते काठमाण्डौको टेकुमा रहेको पचलीमा, माघ १३ गते धर्मभक्त माथेमालाई सिफलमा र गङ्गालाल श्रेष्ठ एवं दशरथ चन्दलाई माघ १५ गते शोभाभगवतीमा मृत्युदण्ड दिइएको थियो । शहीद दिवस राष्ट्रिय पर्वका रूपमा मनाउने गृह मन्त्रालयले जनाएको छ ।
सरकारले सार्वजनिक बिदा दिन यसअघि गरेको निर्णय अर्को वर्ष २०८१ सालदेखि लागू हुने गृह मन्त्रालयका प्रवक्ता नारायणप्रसाद भट्टराईले जानकारी दिनुभयो । गएको पुस १२ गते बसेको मन्त्रिपरिषद् बैठकले शहीद दिवस र रामनवमी गरी २ दिन सार्वजनिक बिदा थप्ने निर्णय गरेको थियो ।

यसैबीच नवलपरासीमा शहीद विष्णु पाण्डे स्मृति प्रतिष्ठान, सुनवलमा शहीद दिवसको अवसरमा विविध कार्यक्रम तथा प्रतिष्ठानको १७ औं साधारण सभा तथा अधिवेशन गरेर मनाउन लागिएको प्रतिष्ठानका अध्यक्ष पेउनारायण न्यौपानेले जानकारी दिनु भयो । शहीद विष्णु पाण्डे २०६२।२०६३ को जनआन्दोलनका क्रममा नवलपरासीको सदरमुकाम परासीमा २०६२ चैत्र ३० गते शहीद हुनु भएको थियो । सो आन्दोलनमा देशभरबाट २६ जना शहीदले आफ्नो प्राण आहुति दिएका थिए ।

यस्तै २०६४ फागुनमा भएको मधेश आन्दोलनको क्रममा पाल्हीनन्दन गाउँपालिका रमपुरवामा जगदिश पासवान शहीद हुनु भएको थियो । शहिद पासवानको स्मृतीमा आज नवलपरासीमा आदर्श माध्यमिक विद्यालयका दृष्टि विहिन बालबालिकाहरुलाई फलफूल वितरण गरिएको छ । यस्तै साँझ बुद्धचोकमा शहीद पासवानको संझनामा दिप प्रज्जवलन गर्ने कार्यक्रम रहेको जनता समाजवादी पाटी (जसपा)का जिल्ला अध्यक्ष धरेन्द्र यादवले जानकारी दिनु भयो ।