परासी । लुम्बिनी प्रदेशका मुख्यमन्त्री चेतनारायण आचार्यले विशेषज्ञ उपचार सेवालाई सबैको पहुँचमा पुर्याउने गरी सरकारले भूमिका बढाउदै लगेको बताउनुभएको छ । सरकारले विशेषज्ञ उपचार सेवा सुनिश्चित गर्दै प्रत्येक नागरिकका लागि समान पहुँच स्थापना गर्ने उद्देश्यले मातहतका अस्पतालहरूको सेवा, सुविधा र संरचना सुदृढ बनाउँदै लगेको स्पष्ट पार्नु भएको हो ।
शनिबार पश्चिम नवलपरासीस्थित पृथ्वीचन्द्र अस्पतालको नयाँ भवन उद्घाटन गर्दै मुख्यमन्त्री आचार्यले उपचार सेवा जनताको पहुँचमा पुर्याउन सरकार सबै तहबाट सक्रिय रहेको धारणा व्यक्त गर्नुभयो । उहाँले प्रदेश सरकार बनेपछि १२ वटै जिल्लाका अस्पतालहरूको सेवा सुदृढ भएकाे बताउनु भयो ।
मुख्यमन्त्री आचार्यले लुम्बिनी प्रदेशलाई स्वास्थ्य सेवा तर्फ उत्कृष्ट प्रदेश बनाउने गरी सरकारले लगानी गरिरहेको स्पष्ट पार्नुभयो । उहाँले स्वास्थ्यकर्मीलाई सेवा प्रभावकारी, गुणस्तरीय र जनमुखी बनाउन निर्देशन दिनुभयो । मुख्यमन्त्री आचार्यले काबु बाहिरका जटिल रोगबाहेक अन्य सबै सेवा अस्पतालबाटै दिनुपर्नेमा जोड दिनुभयो ।
अस्पतालको भौतिक संरचना, उपकरण र दक्ष जनशक्ति सँगै प्रभावकारी सेवा यहीँबाट दिनुपर्छ, मुख्यमन्त्री आचार्यले भन्नुभयो ।
मुख्यमन्त्री आचार्यले अस्पतालमा मृगौलाको डायलासिस सेवा र आँखा उपचार सेवाको पनि आजै शुभारम्भ गर्नुभएको छ।
पछाडि परेका भूगोल, क्षेत्र र समुदायलाई प्राथमिकता दिँदै नीति तथा कार्यक्रम अगाडि बढाइएको जानकारी दिंदै उहाँले पश्चिम नवलपरासीलाई हेर्ने दृष्टिकोणमा कमजोरी आउन नदिइने स्पष्ट पार्नुभयो । उहाँले क्रमागत, बहुवर्षीय तथा वार्षिक योजनामा यस क्षेत्रलाई उच्च प्राथमिकतामा राखिएको जानकारी गराउनुभयो ।
मुख्यमन्त्री आचार्य र स्वास्थ्यमन्त्री खेमबहादुर सारुले संयुक्त रूपमा पृथ्वीचन्द्र अस्पतालको नयाँ भवन उद्घाटन गर्नु भएको हो । स्थापना भएको ११४ वर्ष पुरानो अस्पताल हाल ५० शैयाको क्षमतामा सञ्चालनमा छ । प्रदेश सरकारको १३ करोड ६६ लाख रुपैयाँ लागतमा अस्पतालको नयाँ भवन निर्माण गरिएको हो ।
हाल अस्पतालमा ५९ जना कर्मचारी दरबन्दी कायम छ । जसमध्ये मेडिकल सुपरिटेन्डेन्ट १ सहित १९ जना चिकित्सक कार्यरत रहेका छन् ।
अस्पतालमा बहिरङ्ग सेवा, आकस्मिक सेवा, प्रयोगशाला सेवा, अन्तरङ्ग सेवा, शल्यक्रिया सेवा, निःशुल्क प्रसूति सेवा, दन्त तथा आँखा उपचार, लैङ्गिक हिंसा सम्बन्धी परामर्श तथा उपचार, सुरक्षित गर्भपतन, हाडजोर्नी र फिजियोथेरापी, जनरल फिजिसियन, सिकलसेल एनेमिया परीक्षण र उपचार, रेडियोलोजी सेवा, क्षयरोग स्क्रिनिङ्ग, जेष्ठ नागरिक ओपीडी, स्वास्थ्य बीमा कार्यक्रम, पेन ओपीडी तथा मेडिकोलिगल र पोष्टमार्टम सेवाहरू सञ्चालनमाछन् ।
केही दिनअघि पहिलोपटक पित्तथैलीको शल्यक्रिया सफलतापूर्वक सम्पन्न गरिएको थियो भने मृगौलाको डायलासिस सेवा शुरु गर्ने तयारी भइरहेको अस्पतालले जनाएको छ ।
कार्यक्रममा लुम्बिनी प्रदेश सरकारका स्वास्थ्य मन्त्री खेमबहादुर सारू, सङ्घीय सरकारका पूर्व कानुनमन्त्री एवं प्रतिनिधि सभा सदस्य ध्रुवबहादुर प्रधान, पूर्व रक्षा राज्य मन्त्री रामबचन यादव, लुम्बिनी प्रदेश सरकारका पूर्व मन्त्री बैजनाथ चौधरी, पूर्व गृहराज्य मन्त्री देबेन्द्र राज कण्डेल, पूर्व राज्यमन्त्री घनश्याम यादव, उधोग वाणिज्य संघका अध्यक्ष ओमप्रकाश अग्रहरी, नेपाल पत्रकार महासंघ नवलपरासीका अध्यक्ष केशव पराजुली लगायतले शुभकामना मन्तब्य ब्यक्त गर्नु भएको छ।
अस्पतालका मेडिकल सुपरिटेन्डेन्ट डा मोहम्मद नुरूल होलाको स्वागत मन्तव्य रहेको कार्यक्रममा अस्पतालका श्याम सुन्दर चौधरीले सञ्चालन गर्नुभएको हो ।
अस्पताल उद्घाटन कार्यक्रममा प्रदेश सरकारका मन्त्रीहरू, प्रदेशसभा सदस्यहरू, स्थानीय तहका जनप्रतिनिधिहरू तथा स्वास्थ्य सेवासँग सम्बन्धित संघसंस्थाका प्रतिनिधिहरूको उपस्थिति रहेको थियो । कार्यक्रममा पृथ्वीचन्द्र अस्पताललाई विभिन्न समयमा भौतिक एवं आर्थिक सहयोग गर्ने संघसंस्था र व्यक्तिहरूलाई सम्मान गरिएको छ।
