संघीय संसद भवनमा ज्येष्ठ सदस्य जबराद्वारा सांसदहरुलाई शपथ

राष्ट्रिय समाचार

Home
राष्ट्रिय समाचार
संघीय संसद भवनमा ज्येष्ठ सदस्य जबराद्वारा सांसदहरुलाई शपथ

संघीय संसद भवनमा ज्येष्ठ सदस्य जबराद्वारा सांसदहरुलाई शपथ

प्रतिनिधि सभामा नवनिर्वाचित सांसदले पद तथा गोपनीयताको शपथ ग्रहण गरेका छन् । नयाँ बानेश्वरस्थित संघीय संसद भवनमा बिहीबार एक कार्यक्रमबीच ज्येष्ठ सदस्य पशुपतिशमशेर जबराले सांसदहरुलाई शपथ गराउनु भएको हो । नवनिर्वाचित २६ जना सांसदले भने विभिन्न १४ मातृभाषामा शपथ लिएको संसद् सचिवालयले जनाएको छ ।

नेपालको संविधानको धारा ८८ बमोजिम संघीय संसद्को प्रत्येक सदस्यले बैठकमा पहिलोपटक भाग लिनुअघि संघीय कानून बमोजिम शपथ लिनुपर्ने व्यवस्था छ । सभामुख चयन हुनुअघि ज्येष्ठ सदस्यले प्रतिनिधि सभा सदस्यलाई शपथग्रहण गराउने व्यवस्था छ ।
ज्येष्ठ सदस्यलाई राष्ट्रपतिले शपथग्रहण गराएपछि अन्य सदस्यलाई शपथ गराउने प्रावधान छ । राष्ट्रपति विद्यादेवी भण्डारीले प्रतिनिधि सभाका नवनिर्वाचित ज्येष्ठ सदस्य पशुपतिशम्शेर जबरालाई बुधबार पद तथा गोपनीयताको शपथ गराउनु भएको थियो ।

सभामुख र उपसभामुखको निर्वाचन नभएको वा दुबै पद रिक्त भएको अवस्थामा प्रतिनिधि सभाको बैठकको अध्यक्षता उपस्थित सदस्य मध्ये उमेरका हिसाबले ज्येष्ठ सदस्यले गर्ने संवैधानिक व्यवस्था छ । प्रतिनिधि सभामा प्रत्यक्ष निर्वाचित एक सय ६५ र समानुपातिक प्रणालीबाट निर्वाचित एक सय १० गरी दुई सय ७५ जना सांसद छन् । यसैवीच प्रतिनिधि सभाका १७ जना सांसद सपथ ग्रहण समारोहमा अनुपस्थित रहेका छन् ।

संसद सचिवालयका प्रवक्ता रोजनाथ पाण्डेका अनुसार १७ जना अनुपस्थित रहेको वहाँले वताउनु भयो । र उहाँहरुको सपथ पछि हुने बताइएको छ । यसैवीच सपथ ग्रहणसंगै नेताहरुले नयाँ सरकार गठनबारे प्रतिक्रिया दिएका छन् । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले देशलाई राजनीतिक स्थायित्व दिने हो भने नेकपा एमाले र नेपाली कांग्रेस मिलेर सरकार बनाउनुपर्ने बताउनु भएको छ। झापा क्षेत्र नम्बर ३ बाट विजयी उहाँले बिहीबार संसद भवनमा सांसद पदको शपथ लिएपछि यस्तो बताउनु भएको हो ।
शपथअघि ज्येष्ठ सदस्य जबराले बोलाउनुभएको बैठकमा संसद् सचिवालयका महासचिव डा भरतराज गौतमले शपथ ग्रहणको प्रक्रियाका बारेमा जानकारी गराउनुभएको थियो ।

प्रकाशित मिति: बिहीबार, पुस ७, २०७९ १५:१५

प्रतिक्रिया दिनुहोस्