सत्तारुढ माओवादी केन्द्र, एकीकृत समाजवादी, जनता समाजवादी पार्टी र नेत्रविक्रम चन्द नेतृत्वको पार्टी मिलेर समाजवादी मोर्चा घोषणा भएको छ । काठमाडौंमा सोमबार मोर्चा घोषणासभामा ती दलका नेताहरुले आफूहरुको मोर्चाबन्दीबाट नडराउन अन्य दललाई आग्रह समेत गरेका छन् ।
नेकपा माओवादी केन्द्रका अध्यक्ष एवम् प्रधानमन्त्री पुष्पकमल दाहालले समाजवादी मोर्चा संघीय गणतन्त्रका पक्षधरहरूप्रति परिलक्षित नरहेको बताउनु भयो । उनले हतारमा पार्टी एकता गरेर व्यवहारमा सफल गर्न नसकेको विगतलाई समीक्षा गर्दै समाजवादी मोर्चा जन्मिएको प्रष्ट पार्नु भयो । दाहालले समाजवादी मोर्चा सच्चा र इमान्दार भएर जनताका पक्षमा उभिनेमा कुनै दुविधा नभएको दावी गर्नु भयो ।
एकीकृत समाजवादीका अध्यक्ष माधवकुमार नेपालले मुलुकमा प्रतिगमनको खतरा विद्यमान रहेकाले मोर्चा घोषणाको अबस्था आएको औल्याउनु भएको थियो । अध्यक्ष नेपालले राजनीतिमा भएका विकृति, विसंगति अन्त्य गरेर अगाडि बढ्न मोर्चाले नयाँ यात्रा सुरु गर्ने बताउनु भ यो ।
यस्तै सत्तारुढ दल जनता समाजवादी पार्टी जसपाका अध्यक्ष उपेन्द्र यादवले प्रगतिशील शक्तिहरू एकताबद्ध हुँदा लोकतन्त्र थप बलियो भएको बताउनु भएको छ ।
शान्तिपुर्ण राजनीतिमा आएकोसंगै संसदीय दलको मोर्चामा सहभागि भएको नेपाल कम्युनिस्ट पार्टीका महासचिव नेत्रविक्रम चन्दले प्रतिगामी शक्तिलाई रोक्न समाजवादी मोर्चाले महत्वपुर्ण भूमिका निभाउने दावी गरे ।
लामो समयको छलफल र रस्साकस्सी पछि घोषणा भएको समाजवादी मोर्चाले १५ बुँदे प्रतिबद्धतामा सार्वजनिक गरेको छ । खासगरी संघीयता, लोकतन्त्र, सुशासन, समृद्धि र सामाजिक आर्थिक न्यायलाई नेपाली विशेषताको समाजवादमा परिणत गर्ने उद्देश्यका साथ मोेर्चा घोषणा गरिएको ती दलका नेताहरुले बताएका छन भने मोर्चाको नेतृत्व नेताहरुले आलोपालो गर्ने सहमति भएको छ । शीर्ष नेताहरु रहने संयोजन समिति र प्रत्येक राजनीतिक दलबाट प्रतिनिधित्व हुने गरी सचिवालय बन्ने छ । जसले समाजवादी मोर्चाका आगामी गतिविधिलाई अघि बढाउने छन् । समाजवादी मोर्चामा आवद्ध दलहरुको संसदमा ५४ सिट हुन आएको छ । जसमा माओवादीका ३२, जसपाका १२ र एकीकृत समाजवादीका १० साँसद रहेका रहेका छन् ।
