संसदीय इतिहासमा पहिलो पटक मत विभाजन गरी बजेट बहुमतले पारितः पक्षमा १ सय ४७ र विपक्षमा १ सय ८ मत

राष्ट्रिय समाचार

Home
राष्ट्रिय समाचार
संसदीय इतिहासमा पहिलो पटक मत विभाजन गरी बजेट बहुमतले पारितः पक्षमा १ सय ४७ र विपक्षमा १ सय ८ मत

संसदीय इतिहासमा पहिलो पटक मत विभाजन गरी बजेट बहुमतले पारितः पक्षमा १ सय ४७ र विपक्षमा १ सय ८ मत

आउँदो आर्थिक वर्ष २०८०।८१ को बजेट प्रतिनिधि सभाबाट बहुमतले पारित भएको छ । प्रतिनिधि सभाको बुधवारको बैठकमा उपस्थित भएका दुई सय ५५ जना सांसदमध्ये १ सय ४७ मतसहित बजेट बहुमतले पारित भएको हो । बजेटको विपक्षमा १ सय ८ मत परेकोले बुहमतबाट बजेट पारित भएको सभामुख देवराज घिमिरेले बताउनु भएको थियो ।

प्रमुख प्रतिपक्षी दल नेकपा एमालेले मत विभाजन मागेपछि बजेट पारितका लागि मतदान भएको हो । बैठकमा अर्थमन्त्री डा. प्रकाशशरण महतले आउँदो आर्थिक वर्ष २०८०।८१ बजेट अर्थात् विनियोजन विधेयक २०८० पारित गरियोस् भन्ने प्रस्ताव राख्नु भएकोमा त्यसलाई सभामुख देवराज घिमिरले ध्वनिमतबाट पारित भएको घोषणा गर्नुभएको थियो । सभामुख घिमिरले हुन्छ वा हुन्न भन्ने ध्वनिमतका आधारमा घोषणा गर्नुभएकोमा एमालेका सांसद महेशकुमार बर्तौलाले नियमापत्ति गर्नुभयो । एमाले र राष्ट्रिय स्वतन्त्र पार्टी का सांसदले मत विभाजन गर्नुपर्ने माग गरेपछि मत विभाजन गरिएको हो ।

नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टीसहित सत्ता गठबन्धनका दलले बजेट पारित गर्न संसदीय दलमा अनिवार्य उपस्थिति हुन र प्रस्तावको पक्षमा मतदान गर्न ह्वीप नै लगाएका थिए । प्रमुख प्रतिपक्षी दल नेकपा एमाले र राष्ट्रिय स्वतन्त्र पार्टीसहितका विपक्षी दलले विपक्षमा मतदान गरे ।
अव साउन १ गतेदेखि नयाँ आर्थिक वर्षको बजेट कार्यान्वयनमा आउनेछ । गएको जेठ १५ गते सरकारले आउँदो आर्थिक वर्षका लागि १७ खर्ब ५१ अर्ब रुपैयाँको बजेट ल्याएको थियो । नेपालको संसदीय इतिहासमै पहिलो पटक मत विभाजनबाट सरकारको बजेट पारित भएको छ।

प्रकाशित मिति: बिहीबार, असार १४, २०८० ०६:०६

प्रतिक्रिया दिनुहोस्