न्यायको माग गर्दै धनुषाको एउटा परिवार माइतीघरमा धर्ना बसेको ५३ दिन बित्यो । तर, मुद्दाको पेसी सरेको सर्यै गर्दा न्याय नपाइने हो कि भन्ने शंका उनीहरूमा बढ्न थालेको छ । जनकपुरधाम उपमहानगरपालिका–९ की आरती साहका माइती पक्ष झरी सहेर धर्नामा बसिरहेको हो । दाइजोका नाममा आरतीको हत्या भएको दाबी गर्दै उनीहरू असार १ देखि धर्नामा बसेका छन् ।
धर्ना बसेपछि मात्रै प्रहरीले आरतीको हत्या आरोपमा उनका पति मोतीबाबु साह र ससुरा मदनमोहनविरुद्ध जाहेरी दर्ता गर्यो । उनीहरूविरुद्ध उच्च अदालत धनुषामा मुद्दा चलिरहेको छ । गत जेठ ६ मा आरतीको हत्या भएको माइती पक्षले जनाएका छन् । आरतीका बुबा विनोदप्रसाद साहका अनुसार साउन १८ मा तोकिएको पेसी साउन २५ मा सरेको छ । ‘के कारणले पेसी सारियो ? सुन्दै छु उनीहरू धरौटीमा छुट्दै छन्,’ उनले शंका व्यक्त गरे । हत्यामा संलग्न रहेको दाबी गर्दै सासू रेणुदेवी र देवर रविलाई पनि कानुनी कारबाही गर्नुपर्ने माग रहेको उनले बताए ।
काठमाडौंमा धर्नामा बसेकी आमा निर्मला घर सम्झिइरहन्छिन् । घर छिमेकीको भरमा छाडेको डेढ महिनाभन्दा बढी भइसकेको छ । ‘परिवार नभएपछि खेत बाँझै छ । धान रोप्न पाइएन, के खाएर बाँच्ने हो ?’ उनी भन्छिन् । उनका अनुसार दुई महिनाकी गर्भवती आरती घटना हुनुभन्दा ११ दिनपहिले माइत आएकी थिइन् । ससुरालीले एउटा मोटरसाइकल, दराज र वासिङ मेसिन चाहियो भन्दै आफूलाई माइत पठाएको आरतीले गुनासो गरेकी थिइन् । निर्मलाले त्यति धेरै सामान किन्ने क्षमता नभएको र एउटा दराजसम्म किनिदिने आश्वासन दिएर पठाएकी थिइन् । ‘त्यसपछि छोरी फर्किइनन्,’ निर्मलाले भनिन्, ‘दाइजो नदिएकैले मारेका हुन् ।’
विनोद र निर्मलाका तीन सन्तानमध्ये आरती जेठी हुन् । स्नातक दोस्रो वर्ष पढ्दापढ्दै बिहेपछि पनि पढाउने सर्तमा उनको मोतीबाबुसँग बिहे भएको थियो । बिहे गर्नुअघि दाइजोको मागअनुसार विनोदले १६ तोला सुन र २५ तोला चाँदी केटा पक्षलाई दिए । केटा पक्षले लगाउने लुगादेखि गरगहनासम्मको खर्च आरतीकै बुबाआमाले बेहोरे । विनोदका अनुसार घटना भएको भोलिपल्ट जेठ ७ मा आरतीका ससुरा मदनमोहन साहले ‘तपाईंकी छोरी अस्पतालमा अचेत अवस्थामा छिन्, भेट्न आउनू’ फोन गरे । घरबाहिर रहेका विनोदले कान्छी छोरी मनीषालाई अवस्था बुझ्न जनकपुरको काव्या अस्पताल पठाए । त्यहाँ पुग्दा आरतीको ज्यान गइसकेको थियो । मनीषाका अनुसार डाक्टरले आरतीको मृत्यु अस्पताल आउनुअगाडि नै भएको बताएका थिए । ‘दिदीको पूरै शरीरमा घाउ र चोटपटक थियो,’ उनी भन्छिन् ।
छोरीको हत्या भएको भन्दै जेठ ८ मा जिल्ला प्रहरी कार्यालय धनुषामा उजुरी दिन खोज्दा प्रहरीले सुनेको नसुन्यै गरेको विनोदको भनाइ छ । आरतीका मामा सन्तोष साहले काठमाडौं आएर गृह मन्त्रालय, महिला आयोग, मानवअधिकार आयोग, प्रहरी प्रशासन सबै निकायमा घटनाको निष्पक्ष छानबिनको मागसहित पत्र दिएपछि मात्रै धनुषा प्रहरीले आरतीका ससुरा मदनमोहन र पति मोतीबाबुविरुद्ध जाहेरी दर्ता गर्यो ।
प्रहरीले जेठ ३२ मा आरतीका माइतीलाई बयान लिन भन्दै जिल्ला प्रहरी कार्यालय बोलाएर पहिल्यै तयार कागजमा जबर्जस्ती हस्ताक्षर गर्न लगाएको र नमान्दा निर्घात कुटपिट गरेको मनीषाले बताइन् । ‘आमा, बुबा र दाइलाई समेत कुटपिट गरे,’ उनले भनिन्, ‘मेरो पेटमा लात्ताले हानेकाले धेरै दिन ठाडो भएर उभिनसमेत सकिनँ ।’ त्यहाँ बस्न असुरक्षित महसुस भएपछि न्याय खोज्दै काठमाडौं आएको मनीषाले सुनाइन् । एसपी विश्वराज खड्काले भने कुटपिट गरेको आरोप झूटो भएको दाबी गरे । ‘हामीले कुटपिट गरेका छैनौं, अनुसन्धानले जे देखाउँछ, त्योचाहिँ सत्य हो,’ उनले भने, ‘यो घटनामा संवेदनशील भएर अनुसन्धान गरिरहेका छौं । जो दोषी देखिन्छ, समातिँदै जान्छन् ।’
#kantipur
