परासी । देशभर बिहिबारदेखि माध्यमिक शिक्षा परीक्षा (एसइइ) शुरु हुँदैछ । देशभर १ हजार ९ सय ६६ परीक्षा केन्द्र तोकिएका छन् । बिहीबारबाट सुरु हुने एसईई परीक्षामा ५ लाख १२ हजार ४२१ जना विद्यार्थीले परीक्षा दिँदैछन् । जसमा २ लाख ५७ हजार ६१३ जना छात्रा, २ लाख ५४ हजार ८०१ छात्र र ७ जना अन्य विद्यार्थी परीक्षामा सहभागी हुने परीक्षा नियन्त्रक टुकाराज अधिकारीले बताउनुभयो ।
पश्चिम नवलपरासीमा पनि बिहिबारदेखि हुने तयारीको तयारी पूरा भएको बताइएको छ । शिक्षा विकास तथा समन्वय इकाइले २३ वटा परीक्षा केन्द्रबाट परीक्षा सञ्चालन गर्ने तयारी गरेको जनाएको छ ।
नवलपरासीबाट यस बर्ष ५ हजार ७७४ विद्यार्थी एसइई परीक्षामा सहभागी हुँदैछन् । जसमा साधारण नियमित तर्फ २ हजार २७२ छात्र र २ हजार ११५ छात्रासहित ४ हजार ३८७ विद्यार्थी छन् भने प्राविधिक धार नियमित तर्फ ६५ छात्र र ५१ जना छात्रा गरी ११६ जना छन् ।
नयाँ पाठ्यक्रम अनुसारको ग्रेडवृद्धि तर्फ ५६९ छात्र र ६८५ छात्रा गरि १ हजार २५४ जना सहभागी हुँदै छन् भने पुरानो पाठ्यक्रम तर्फ ४ जना छात्र र १२ जना छात्रा गरी १७ जना परीक्षामा सहभागी हुन लागेको शिक्षा विकास तथा समन्वय इकाई नवलपरासीका प्रमुख महेन्द्र सुवेदीले जानकारी दिनुभयो । उहाँले विद्यार्थीहरुलाई उच्च मनोवलका साथ निधक्क भएर परीक्षा दिन आग्रह गर्नु भयो । उहाँले जिल्लाका २३ वटै परीक्षाकेन्द्र पूर्णतया शान्तिपूर्व सञ्चालन हुने बताउनुभएको छ ।
परीक्षा २९ गते सकिने समय तालिका छ । गत माघ ७ गते राष्ट्रिय परीक्षा बोर्डले समयतालिका सार्वजनिक गरेको थियो ।
परीक्षा बिहान ८ बजेदेखि ११ बजेसम्म सञ्चालन हुनेछ । समयतालिका अनुसार पहिलो दिन अनिवार्य अंग्रेजी विषयको परीक्षा सञ्चालन हुनेछ । दोस्रो दिन चैत २० गते अनिवार्य नेपाली, २२ गते अनिवार्य गणित, २३ गते विज्ञान तथा प्रविधि, २४ गते सामाजिक अध्ययन, २५ गते ऐच्छिक प्रथम खण्डका सबै विषय, २६ गते ऐच्छिक द्वितीय खण्डका सबै विषय र चैत २७, २८ र २९ गते प्राविधिक धारका बाँकी विषयहरूको परीक्षा सञ्चालन हुनेछ ।
