लुम्बिनी प्रदेशकै पहिलो महिला विद्यायलमा एसइइको उत्साहजनक नतिजा

शिक्षा

Home
शिक्षा
लुम्बिनी प्रदेशकै पहिलो महिला विद्यायलमा एसइइको उत्साहजनक नतिजा

लुम्बिनी प्रदेशकै पहिलो महिला विद्यायलमा एसइइको उत्साहजनक नतिजा

परासी । नवलपरासीको सुनवल नगरपालिकाद्वारा स्थापित लुम्बिनी प्रदेशकै पहिलो महिला विद्यालयका रूपमा परिचित लुम्बिनी समता महिला विद्यालयले एसईई परीक्षामा उत्साहजनक सफलता प्राप्त गरेको छ । विद्यालयबाट पहिलो पटक एसईईमा सहभागी भएका सात जना महिलामध्ये चार जना उत्तीर्ण भएका छन् ।

पढ्न इच्छा भए उमेर बाधक नबन्नेकुराको ज्वलन्त उदाहरण महिलाहरुले दिएका छन् । विद्यालयका अनुसार सहभागी सात जनामध्ये चार जना उत्तीर्ण भएका छन् भने बाँकी तीन जनाले मौका परिक्षा दिने तयारी गरिरहेका छन् । पहिलो प्रयासमै आएको नतिजालाई विद्यालयले ऐतिहासिक उपलब्धिका रूपमा लिएको छ ।

विद्यालयकी प्रधानाध्यापक राधिका रोकाले सिक्ने इच्छाशक्ति भए उमेरले कहिल्यै नछेक्ने बताउनुभयो । विद्यालयमा अध्ययन गर्ने महिलाहरूको उमेर १८ वर्षदेखि ७० वर्षसम्म रहेको छ । घरायसी जिम्मेवारीका कारण पढाइ बीचमै पड्ने मौका गुमाएका महिलाहरुकालागि महिला विद्यालय कोशेढुँगा भएको छ । नगरपालिकाकी प्रमुख विमला अर्याल निर्वाचित भएर आएसँगै महिला विद्यालयको शुभारम्भ गर्नुभएको थियो । आफ्नो चुनावी वाचा अनुरुप महिला सशक्तिकरण, महिलाहरुको नेतृत्व विकास र अवसर सृजना गर्नेकाम आफूले निरन्तर गरिरहेको नगरप्रमुख अर्यालले बताउनुभयो । नगरप्रमुख अर्यालले विद्यालयले प्राप्त गरेको सफलता सुनवल नगरकै गारैवको विषयभएको बताउनुभएको छ ।

उहाँले महिलाहरुले प्राप्त गरेको एतिहासिक उपलब्धीले महिलाको शिक्षामा थप लगानी गर्न स्थानीय सरकारलाई हौसला मिलेको बताउनु भयो ।
हाल कक्षा ४ देखि १० सम्म पढाइ हुने यस सामुदायिक विद्यालयमा करिब १०० जना महिलाहरू अध्ययनरत छन् । सीमित स्रोतसाधन, ६ जना शिक्षकको भरमा विद्यालयले हासिल गरेको उपलब्धिलाई अर्थपूर्ण रूपमा हेरिएको छ ।

विगतमा विभिन्न सामाजिक तथा पारिवारिक कारणले विद्यालय जान नपाएका महिलाहरूका लागि अहिले यो विद्यालय आशाको केन्द्र बनेको छ । विद्यालय सञ्चालन भएसँगै आमा र बुहारीहरू विद्यालय जाँदा अचम्म मान्ने समाज अहिले उनीहरूको सफलतामा गर्व गर्न थालेको छ ।

प्रकाशित मिति: बिहीबार, वैशाख ३१, २०८३ १५:२८

प्रतिक्रिया दिनुहोस्