नेकपा एमाले बागमती प्रदेशको प्रथम अधिवेशन सुरु,अध्यक्षमा पाँच आकाङ्क्षी

राजनीति

Home
राजनीति
नेकपा एमाले बागमती प्रदेशको प्रथम अधिवेशन सुरु,अध्यक्षमा पाँच आकाङ्क्षी

नेकपा एमाले बागमती प्रदेशको प्रथम अधिवेशन सुरु,अध्यक्षमा पाँच आकाङ्क्षी

नेकपा एमाले बागमती प्रदेशको प्रथम अधिवेशन सोमबारबाट सुरु हुँदै छ । अधिवेशनको एमाले अध्यक्ष केपी शर्मा ओलीले उद्घाटन गर्दैछन् । उद्घाटनअघि काठमाडौँको अनामनगर, लैनचौर, भद्रकालीलगायत विभिन्न स्थानबाट र्‍याली निकालिने एमाले बागमती प्रदेश कमिटीले जनाएको छ । काठमाडौँको भृकुटीमण्डपस्थित राष्ट्रिय सभा गृहमा उद्घाटन हुने अधिवेशनले प्रदेशमा पाँच पदाधिकारीसहित २४० सदस्यीय नयाँ नेतृत्व चयन गर्नेछ । त्यसका लागि झण्डै १२ प्रतिनिधि छनोट भैसकेका छन् ।

केन्द्रीय तहका नेताहरूले समेत चासोका साथ लिएको बागमतीमा नेताहरू सुरेन्द्र पाण्डे, अष्टलक्ष्मी शाक्य, महेश बस्नेत, गोकुल बाँस्कोटा लगायतले सर्वसम्मत नेतृत्व चयनका लागि पहल गरेको बुझिएको छ । तर प्रदेश अध्यक्ष पदमा आकाङ्क्षीहरू बढेपछि सहमतिमा नेतृत्व चयन गर्ने पार्टी नेतृत्वको प्रयास सफल हुने सम्भावना कम हुँदै गएको एमाले बागमतीका नेता कार्यकर्ताहरूको भनाइ छ । यद्यपि नेताहरूबिच सर्वसम्मत नेतृत्व चयनका लागि छलफल भइरहेको केन्द्रीय नेताहरूले बताएका छन् ।

अध्यक्षमा केन्द्रीय सदस्यहरू रामेछापका कैलाश ढुंगेल, मकवानपुरका कृष्ण दाहाल र नुवाकोटका केशवराज पाण्डेसहित नेताहरू चितवनका कृष्णभक्त पोखरेल र काठमाडौँका सानुकुमार श्रेष्ठ दाबेदारका रूपमा अघि आएका छन् । सहमति नभए अन्तिममा ढुंगेल र पोखरेलबीच चुनावी प्रतिस्पर्धा हुने सम्भावना रहेको नेताहरूको भनाइ छ । संघीय संरचनामा गएपछि पहिलो चोटि एमालेमा बागमती प्रदेश अधिवेशन हुँदै छ ।

प्रकाशित मिति: सोमबार, असोज ८, २०८० १०:३४

प्रतिक्रिया दिनुहोस्