परासी । रामग्राम नगरपालिकामा आधारभूत तहको शिक्षाको गुणस्तरमा सुधार आएको छ । सोमबार कक्षा ८ अर्थात आधारभूत तहको नतिजा सार्वजनिक गर्दा नतिजा गत बर्षको तुलनामा यस बर्ष सुधार आएको देखिएको हो ।
रामग्रामले आधारभूत तहमा शिक्षाको गुणस्तर जस्तो छ त्यसलाई जस्ताको तस्तै प्रकाशन गर्ने जमर्को गर्यो, ढाकछोपको गुन्जायर राखेन । तर दुई विषयसम्म अनुत्तिर्ण भएकालाई मौका परिक्षाको व्यवस्था पनि गरेको छ ।
यस वर्ष ४९ दशमलव ५२ प्रतिशत विद्यार्थी उत्तिर्ण भएको र विद्यालयका आधारमा विद्यार्थी उत्तिर्ण दर भने ५३ दशमलव ३८ प्रतिशत रहेको नगरपालिकाले जनाएको छ । नगरक्षेत्र भित्रका ३१ वटा विद्यालयका कुल ११ सय ६१ जना विद्यार्थीहरुले परीक्षा दिएकोमा ५७५ जना ग्रेडिङ्गमा परेको नगरपालिकाका शिक्षा अधिकृत सुन्दर खनालले बताउनु भयो ।
“रामग्राम नगरपालिको एउटै इच्छा, बालबालिकाकालाई सीपमूलक र गुणस्तरीय शिक्षा” भन्ने मूल नारा तय गरेर शिक्षाको गुणस्तर सुधारकालागि काम गरिएको नगरप्रमुख धनपत यादवले वताउनु भयो । विद्यालयमा विद्यार्थीको उपस्थिति राम्रो बनाउन गत बर्षदेखि नै खाजामा प्रतिदिन १० रुपैयाँका थप गरी विद्यार्थीलाई सहभागी गराईएको छ भने त्यसको निरन्तर अनुगमन गर्ने काम पनि गरिएको नगरप्रमुख यादवको दावि छ ।
शिक्षाकै गुणस्तर सुधारकालागि गत बर्ष शिक्षक सरुवा तथा वढुवाको नीति नगरपालिकाले अगाडि सारेको थियो । प्रारम्भमा केही विरोधका स्वर सुनिएपनि अहिले आएर नगरपालिकाले गरेको निर्णयले सार्थकता पाउँदै गएको नगरप्रमुख यादवले दावीगर्नु भएको छ । आउँदा दिनमा विद्यालयमा अनुगमन प्रभावकारी बनाउने, आवश्यकताको आधारमा शिक्षक सरुवा वा जिम्मेवारी हेरफेर गर्ने, शिक्षकहरुलाई तालिम, अभिभावकहरुलाई अनुशिक्षण र विद्यालय प्रशासनलाई चुस्तदुरुस्त बनाउँदै लगिने नगरप्रमुख यादवको भनाई रहेको छ ।
यस बर्ष विद्यार्थीको वास्तविक अवस्था र विद्यालयको पनि शैक्षिक अवस्था बारे यथार्थ जानकारी दिने उदेश्यले थप नम्बर नदिई नतिजा प्रकाशन गरेको नगर प्रमुख धनपत यादवले बताउनु भयो । अभिवाकलाई पनि थप जिम्मेवार र सचेत वनाउने, विद्यालयले पनि नगरपालिकाको सोंच अनुसार काम गर्दै जाने हो भने नगरपालिकाको शिक्षाको गुणस्तर ह्वात्तै बढेर जाने नगरप्रमुख यादवको दावी छ ।
दुई विषयसम्म ग्रेडिङ्ग नभएका विद्यार्थीलाई यहि बैशाख २१ र २२ गते मौका परीक्षाको व्यवस्था गरिएको नगर शिक्षा शाखाका अधिकृत खनालले जानकारी दिनुभयो ।
