परासी । पश्चिम नवलपरासीको शिक्षा विकास तथा समन्वय इकाईले शैक्षिक सत्र २०८० को जिल्लाको शैक्षिक तथ्याङ्क सार्वजनिक गरेको छ । जिल्लाका विभिन्न शैक्षिक संघ,संगठन, सातैवटै पालिकाका शिक्षा अधिकृत र सरोवारवाला निकायहरुका बीच शैक्षिक तथ्याङ्क सार्वजनिक गरिएको हो ।
पश्चिम नवलपरासीमा ३ सय ७९ वटा विद्यालय रहेको जिल्लाको एक तथ्याङ्कले देखाएको छ । समन्वय इकाईको एक तथ्याङ्क अनुसार नवलपरासीमा सामुदायिक विद्यालय २ सय १७, संस्थागत विद्यालय १ सय १३ र धार्मिक विद्यालय ४९ गरी ३ सय ७९ विद्यालय रहेका छन् ।
यस्तै जिल्लामा शैक्षिक सत्र २०८० मा कुल १ लाख ५ हजार ३७६ विद्यार्थीहरुले अध्ययन गरेका छन् । जसमा सामुदायिक विद्यालय तर्फ ६४ हजार ५६९ र संस्थागत विद्यालयमा ४० हजार ८०७ विद्यार्थीहरुले अध्ययन गरिरहेका छन् जिल्लाको तथ्याङ्कलाई हेर्नेहो भने २२.५६ प्रतिशत वढी विद्यार्थी संस्थागत भन्दा सामुदायिक विद्यालयमा अध्ययन गर्ने गरेको पाइएको छ । तर जिल्लाका सातै वटै पालिकाको तथ्याङ्कलाई हेर्दा वर्दघाट नगरपालिकामा सामुदायिक विद्यालयमा भन्दा संस्थागत विद्यालयमा विद्यार्थीको संख्या वढी छ । सामुदायिक विद्यालयमा ९ हजार ९०१ विद्यार्थी छन् भने संस्थागत तर्फ १० हजार १६९ रहेका छन् । अर्थात यो संख्याले २६८ ले बढी हो ।
यस्तै जिल्लाका सातै पालिकामा शिक्षक दरवन्दी १ हजार २५१ रहेको छ । दरवन्दीलागि तहगत हिसावले हेर्दा प्राथमिक तहमा ८ सय २२, निम्न माध्यमिक विद्यालय तहमा २ सय २२, माध्यमिक तह (९—१०) १ सय ५७ र माध्यमिक तह (११—१२) मा ५० दरवन्दी रहेको इकाई प्रमुख पूर्णबहादुर विश्वकर्माले जानकारी दिनु भयो ।
यसैबीच जिल्लाका विभिन्न शैक्षिक सरोकारवालाहरुले शैक्षिक गुणस्तर कायम गर्ने प्रतिवद्धता व्यक्त गरेका छन् । सुनवल नगरपालिकाका शिक्षा अधिकृत पशुपति भट्टराईले शिक्षाको गुणस्तर कायम गर्न पालिका मै बसेर काम गर्न सकिने धारणा व्यक्त गर्नु भयो ।
समन्वय इकाईको आयोजनामा भएको शैक्षिक तथ्याङ्क सार्वजनिक कार्यक्रममा नेपाल शिक्षक संघ नवलपरासीका अध्यक्ष भोजराज चापागाईं, शिक्षक महासंघ नवलपरासीका अध्यक्ष अरविन्द पाठक, नेपाल पत्रकार महासंघ नवलपरासीका अध्यक्ष हरि शर्मा, समन्वय इकाइका शाखा अधिकृत सुदिप गिरी लगायतले जिल्लाको शैक्षिक गुणस्तर बृद्धि गर्ने प्रतिवद्धता जनाउनु भएको हो ।
