परासी । नेकपा एमाले नवलपरासीको प्रथम पूर्ण बैठक मंगलबार सुनवलमा सम्पन्न भएको छ । बैठकले २९ जनाको पदाधिकारी रहने गरी जिल्ला सचिवालय गठन गरेको छ भने २३ वटै जनवर्गिय संगठनको इन्चार्ज, सवै विभागहरुको विभागीय जिम्मेवारी र ७ वटै पालिकाको इन्चार्जको जिम्मेवारी तोकिएको जिल्ला सचिव धिरज शर्मा बस्यालले जानकारी दिनुभयो ।
एमाले जिल्ला कमिटिका अध्यक्ष दिपेन्द्रकुमार अधिकारीको अध्यक्षता तथा केन्द्रीय कमिटि सदस्य एव नवलपरासी इन्चार्ज बलराम अधिकारीको प्रमुख आतिथ्यमा प्रथम बैठक सम्पन्न भएको हो ।
बैठकले भूगोल तर्फ संघिय निर्वाचन क्षेत्र नं. १ र २ तथा संघीय निर्वाचन क्षेत्र १ को प्रदेश क्षेत्र (क) (ख) र क्षेत्र नं. २ प्रदेश निर्वाचन क्षेत्र (क) (ख) मा पनि जिम्मेवारी तोकेको छ ।
निर्वाचन क्षेत्र नं. १ मा ईश्वरी घिमिरे र प्रदेश (क) मा सुवास चन्द्र जि.सी र (ख) मा रामप्रसाद पाण्डेलाई इन्चार्ज तोकेको छ । यस्तै निर्वाचन क्षेत्र नं. २ मा लेखनाथ खरेल र प्रदेश (क) मा थमनसिंह नेपाली र (ख) मा सरीता पौडेललाई इन्चार्ज तोकेको हो ।
यस्तै नेकपा एमाले जिल्ला कमिटिको बैठकले सातै वटा पालिकामा इन्चार्जको जिम्मेवारी तोकेको छ । बैठकले रामग्राम नगरको इन्चार्जमा राममिलन साहानी, सुनवल नगर इन्चार्जमा कर्णबहादुर सेन, बर्दघाट नगर इन्चार्जमा राधा ढकाल, सरावल गाउँपालिका इन्चार्जमा देवराज श्रेष्ठ, सुस्ता गाउँपालिका इन्चार्जमा युवराज डुम्रे, प्रतापपुर गाउँपालिका इन्चार्जमा तारा सिंह थापा र पाल्हीनन्दनमा रामप्रसाद चौधरीलाई इन्चार्जको जिम्मेवारी दिइएको हो ।
यस्तै जिल्ला पार्टी कार्यालयको सचिवमा रामचन्द्र भण्डारीलाई जिम्मेवारी दिइएको छ भने बैठकले आगामी १ बर्षको बार्षिक कार्ययोजना पनि पारित गरेको छ । बैठकले ११ जना नयाँ सदस्यहरुलाई मनोनित पनि गरेको बताइएको छ ।
बैठकमा केन्द्रीय सदस्य सरीता भुषाल खनाल, बिमला अर्याल, नेता बद्रीनाथ खनाल, नेता थानप्रसाद गैरे लगायतले शुभकामना व्यक्त गर्नु भएको जिल्ला कमिटिका उपाध्यक्ष डोलराज भण्डारीले जानकारी दिनु भयो ।
एमाले नवलपरासीको गत बैशाख २१, २२ र २३ गते सुनवलमा नवौं अधिबेशन सम्पन्न भएको थियो । पार्टी अध्यक्ष केपी शर्मा ओलीले अधिवेशनको उद्घाटन गर्नु भएको हो ।
