परासी । नवलपरासीको सरावल–२, अत्रहटीमा शनिवारदेखि तीन दिनसम्म ५२ औँ महाशिवरात्रि मेला आयोजना हुने भएको छ । प्रत्येक बर्षजस्तै यस बर्ष पनि महाशिवरात्रीको अवसरमा विभिन्न कार्यक्रमहरू सञ्चालन गर्न लागिएको बताइएको छ । झन्डै डेढ सय वर्ष पुरानो उक्त मन्दिरमा विगत ५१ वर्षदेखि महाशिवरात्रीको अवसरमा मेला लाग्दै आएको स्थानीय धार्मिक अगुवाहरूले बताएका छन् । महोत्सव स्थानीय शिव मन्दिर संरक्षण संस्थाको आयोजना र सरावल गाउँपालिका तथा वडा नं. २ कार्यालय मनरीको आर्थिक सहयोगमा हुने छ ।
आयोजक संस्थाका अनुसार महोत्सव अन्तर्गत फाल्गुन २ गते शनिबार बिहान १० बजे कलशयात्रा तथा समुद्घाटन कार्यक्रम गरिनेछ । मेला फाल्गुन ४ गतेसम्म सञ्चालन हुने संस्थाका अध्यक्ष दामोदर देवकोटाले जानकारी दिनुभयो ।
धार्मिक, सांस्कृतिक तथा सामाजिक महत्व बोकेको अत्रहटी महोत्सवमा विभिन्न सांस्कृतिक कार्यक्रम, कलश यात्रा, भजन–कीर्तन तथा स्थानीय कला–संस्कृति झल्किने प्रस्तुति समावेश गरिने आयोजक संस्थाका सदस्य एवं साँस्कृतिक संयोजक जीवन चौधरीले बताउनु भएको छ ।
महाशिवरात्री पर्वको अवसरमा फाल्गुन ३ गते आइतबार खुल्ला पुरुष भलिबल प्रतियोगिता हुने छ । विजेता हुने समूहले प्रथम पुरस्कार ७५ हजार, द्वितीय पुरस्कार ४० हजार र तृतीय पुरस्कार २० हजार कप र मेडलको व्यवस्था गरिएको भलिबल खेल संयोजक ओमनारायण रायले जानकारी दिनुभयो ।
सरावल गाउँपालिका, वडा नं. २ कार्यालय र शिव मन्दिर संरक्षण संस्था, सरावल–२, अत्रहटीले महाशिवरात्री मेलामा भक्तजन तथा सर्वसाधारणलाई उपस्थित भई कार्यक्रम सफल बनाउन आग्रह गरेका छन् ।
