परासी । नवलपरासीका एमाले महिला नेतृहरूले प्रतिनिधि सभा निर्वाचनमा एमालेका सूर्यध्वजा वाहक उम्मेदवार लेखनाथ खरेललाई अमुल्य मतदान गरी विजयी गराउन आममतदातालाई आग्रह गरेका छन् । उनीहरूले नेकपा एमाले सरकारमा भएका बेला गरेका राम्रा कामहरूको समिक्षा गर्दै अधुरा र अपुरा काम सम्पन्न गर्न पुनः एमालेलाई मतदान गर्न आग्रह गरेका हुन् ।
नेकपा एमालेकी केन्द्रीय सदस्य लक्ष्मि क्षेत्रीले पार्टीले नवयुवा पुस्ताको प्रतिनिधित्व हुनेगरी खरेललाई उम्मेदवार बनाएको बताउनु भयो । उहाँले “उम्मेदवार खरेल सामाजिक व्यक्तित्व, यो क्षेत्रको आशा र भरोशा भएकोले आममतदाताले उहाँलाई नै रोज्ने छन् र सूर्यमा मतदान गर्ने छन् भन्ने मेरो विश्वास छ”, महिला नेतृ क्षेत्रीले भन्नुभयो ।
महिला नेतृ क्षेत्रीले नेकपा एमाले सरकारमा भएका बेला थालिएका दर्जनौ विकास निर्माणका काम अपुरा भएकोले ती पुरा गर्न पनि एमालेका उम्मेदवारले जित्नु पर्ने दावि गर्नुभयो ।
यस्तै नेकपा एमाले नवलपरासीकी सचिवालय सदस्य सरीता पौडेलले पार्टी नीति, विधि र सिद्धान्त अनुसार चल्नु पर्ने बताउँदै नयाँ भन्नेहरूको भ्रममा नपर्न आग्रह गर्नु भएको छ । उहाँले प्रत्यक्ष तर्फ खरेल र समानुपातिक तर्फ रिंगला यादवलाई पार्टीले अगाडि सारेको बताउँदै क्षेत्र नं. २ का मतदातालाई मतदानका लागि आब्हान गर्नुभयो । एमाले नेतृ पौडेलले देश जलाउनेलाई नभै देश बनाउनेलाई मतदान गर्नुपर्ने बताउनुभयो ।
उहाँले गत भदौ २३ र २४ गते भएको शान्तिपूर्ण जेनजी आन्दोलनमा घुसपैठ हुनु, दर्जनौ नेपाली नागरिकको ज्यान जानु र देशका धरोहरहरु जल्नु दुखद भएको बताउनु भयो । उहाँले नेकपा एमाले देश जलाउने नभै देश बनाउने पार्टी भएको दावि गर्नुभयो ।
यस्तै नेकपा एमाले नवलपरासीकी जिल्ला कमिटि सदस्य एवं रामग्राम नगर सहइन्चार्ज यमकुमारी सुवेदीले नेकपा एमाले बलियो संगठनात्मक शक्ति भएको पार्टी भएकोले चुनावको बेला संगठन परिचालन गरीएको बताउनु भयो । निर्वाचनका बेला पार्टीको वडा—टोल कमिटिहरूलाई पनि परिचालन गरिएको उहाँको भनाई छ । नेकपा एमालेको नेतृत्वमा पालिका, प्रदेश र संघीय सरकारले यसक्षेत्रमा भौतिक पूर्वाधार निर्माण, सडक पुलपुलेसा निर्माण, शिक्षा, स्वास्थ्य, खानेपानी लगायतका क्षेत्रमा व्यापक विकास भएकोले सहि नेतृत्वले मात्र देश विकासको खाका कोर्ने भएकोले आगामी निर्वाचनमा पनि नेकपा एमालेका सूर्यध्वजावाहक उम्मेदवार लेखनाथ खरेललाई बिजयी बनाउन आब्हान गर्नु भएको छ ।
