परासी । रामग्राम नगरपालिकाले कृषकहरुलाई गहुँको उन्नत बीउ वितरण गरेको छ । चालु आर्थिक बर्ष २०८३।०८४को बार्षिक योजना अनुसार नगरपालिकाले कृषकहरुलाई ५० प्रतिशत अनुदानमा गहुँको उन्नत बीउ वितरण गरिएको जनाएको हो ।
रामग्राम नगरपालिकाका नगरप्रमुख धनपत यादवले आज पालिकाका विभिन्न वडाबाट उपस्थिति कृषकहरुलाई बीउ हस्तान्तरण गर्नु भएको हो । बीउ बितरणका लागि वडा कार्यालयबाट प्राप्त कृषकहरुको माग विवरण अनुसार विभिन्न जातका बीउ वितरण गरिएको छ ।
प्रतिबारो ४० के.जीको १ हजार ७६० का दरले कृषकहरुले पनि लगानी गरेका छन् । रामग्राममा उन्नत जातका जिंक गहुँ १, विजय, एनएल ९७१, बोर्लग २०२०, आदित्य र बाणगंगा लगायतका छन् ।
नगरप्रमुख यादवले उन्नत बिउ वितरणसँगै कृषि उत्पादन बढाउनु पर्नेमा जोड दिनुभयो । उहाँले कृषि क्षेत्रमा उत्पादन बढाउन सकेमा कृषकहरुको आर्थिक उन्नती र प्रगति हुन सक्ने बताउनु भयो ।
नगरप्रमुख यादवले आलु खेती गर्ने कृषकलाई पनि अनुदानको व्यवस्था भएको बताउँदै सो कार्यका लागि पालिकाले १० लाख बजेट विनियोजन गरेको जानकारी दिनुभयो । उहाँले आलु खेतिका लागि समूह वा संस्थाबाट कार्यसम्पादन गर्नुपर्ने बताउनु भयो ।
रामग्राम नगरपालिकामा ५ हजार ९६० हेक्टर क्षेत्रफलमा गहुँ खेति हुँदै आएको छ भने कुल २१ हजार ४५६ मेट्रिकटन गहुँ उत्पादन हुने गरेको कृषि विकाश शाखाका प्रमुख किरण गुप्ताले बताउनुभयो ।
चालु आर्थिक बर्ष २०८३।०८४ मा नगरपालिकाले गहुँको विउ वितरण गर्न ९० लाख बजेट विनियोजन गरेको जनाएको छ । जसमा कृषकहरुले ४४ लाख २५ हजार लगानी गरेका छन् ।
कृषि सामाग्री कम्पनी लिमिटेड, भैरहवाबाट ९८.२ मेट्रिकटन, अर्थात २ हजार ४५५ बोरा गहुँका बीउ खरिद गरिएको कृषि शाखा प्रमुख गुप्ताले बताउनु भयो । कार्यक्रममा नगरपालिकाका प्रमुख प्रशासकीय अधिकृत खेमराज देवकोटाको उपस्थिति रहेको थियो ।
