परासी । पश्चिम नवलपरासीको सदरमुकाम परासीमा आज बुधवारदेखि छैठौँ नवलपरासी औद्योगिक व्यापार मेला शुरु हुँदैछ । नवलपरासी उद्योग वाणिज्य संघको आयोजनामा आगामी फागुन ३० गतेसम्म सञ्चालन हुन लागेको उक्त मेला नेपाल सरकारका अर्थमन्त्री डा. प्रकाशशरण महतले दिउसो १ बजे समुदघाटन गर्नुहुने छ ।
रामग्राम–५ वाईपास रोडको उत्तरपट्टि सञ्चालन हुने मेलाको तयारी सकिएको संघका अध्यक्ष ओमप्रकाश अग्रहरीले जानकारी दिनुभयो । मेला स्थल सिँगारिएको छ, स्टल, सचिवालय, मंच, प्रवेशद्धारहरु आकर्षक बनाइएको छ । यस्तै रामग्राम नगर पालिकाका विभिन्न स्थानमा स्वागतद्धार पनि निर्माण गरिएको छ । आज दिउँसो १ बजे अर्थमन्त्री महतले मेलाको औपचारिक रुपमा उद्घाटन गर्ने अध्यक्ष अग्रहरीले बताउनुभयो । उद्घाटन अघि परासीको आदर्श माविबाट बिहान ११ बजे विभिन्न जातजाती, धार्र्मिक संस्था तथा अन्य सामाजिक संघ संस्थाको व्यानर, झाँकी र बाजागाजा सहित नगर परिक्रममा गर्ने कार्यक्रम रहेको अध्यक्ष अग्रहरीले जानकारी दिनुभयो ।
मेलाको आकर्षणको रुपमा परम्परागत तथा जिल्लाको संस्कृति झल्कने गरी विभिन्न जातजातीको भेषभुषा सहितको झाँकी प्रदर्शनी, ख्याति प्राप्त राष्ट्रिय तथा स्थानीय कलाकारहरुद्धारा विविध सांस्कृतिक कार्यक्रमहरु, नवलपरासीका स्थानीय तह स्तरीय सांस्कृतिक प्रतियोगिता, जिल्लामा रहेका कृषि उपज, लघु उद्यमी, महिला उद्यमी द्धारा उत्पादित वस्तुहरुको प्रदर्शनी, यस क्षेत्रका धार्मिक एवं पर्यटकीय स्थलहरुको चिनारी सहितको प्रवद्र्धन लगायत रहने संघकी महासचिव आचार्यले बताउनुभयो । कृषि, घरेलु तथा लघु उद्यमीका उत्पादनसहित जिल्लामा रहेका उद्योगका उत्पादनको प्रवद्र्धन हुने गरी स्टलहरुलाई प्राथमिकता दिएको छ । करिब २ लाख दर्शकले अवलोकन गर्ने लक्ष्य लिइएको मेलामा ५ करोड १० लाखसम्म आर्थिक कारोबार हुने अपेक्षा संघले गरेको छ ।
मेला अवलोकनका लागि टिकट दर रु १०० निर्धारण गरिएको छ भने विद्यार्थीलाई परिचय पत्रका आधारमा रु ७० र विद्यालयबाट सामूहिक आएमा रु ५० को दरले निर्धारण गरिएको छ । ज्येष्ठ नागरिक, असक्त तथा फरक क्षमता भएकाहरुलाई भने निःशुल्क प्रवेशको व्यवस्था गरिएको आयोजक उद्योग वाणिज्य संघले जनाएको छ ।
