चिनियाँ अन्तर्राष्ट्रिय टोलीद्वारा रामग्राम स्तुपको अवलोकन

पर्यटन

Home
पर्यटन
चिनियाँ अन्तर्राष्ट्रिय टोलीद्वारा रामग्राम स्तुपको अवलोकन

चिनियाँ अन्तर्राष्ट्रिय टोलीद्वारा रामग्राम स्तुपको अवलोकन

परासी । रामग्राम स्तूपमा चिनियाँ अन्तर्राष्ट्रिय बुद्धिष्ट मेडिटिएसन एसोसिएसनका कार्यकारी अध्यक्ष प्रोफेसर हु याङसेङ नेतृत्वको टोलीले अवलोकन गरेको छ । रामग्राम नगरपालिकाका नगरप्रमुख धनपत यादवको आग्रहमा प्रोफेसर हु याङसेङको टोली अवलोकनका लागि आएको हो ।

सो अवसरमा नगर प्रमुख धनपत यादव सहित अन्य जनप्रतिनिधि र स्थानीय संघसंस्थाका प्रतिनिधिहरुले स्वागत गरेका थिए । अवलोकनका क्रममा प्रोफेसर हु याङ्सेङले गौतम बुद्धको एक मात्र अस्तुधातु रहेको रामग्रामको अवलोकन गर्न पाउँदा आफू र सिङ्गो चिनियाँ टोली खुसी भएको बताउनुभयो । उहाँले रामग्रामको पर्यटन प्रवद्र्धनका लागि निरन्तर सहयोग गर्ने प्रतिवद्धता व्यक्त गर्नुभयो ।

चिनियाँ टोलीलाई स्वागत गर्दै नगरप्रमुख यादवले रामग्रामको ऐतिहासिक, धार्मिक र सांस्कृतिक महत्वको बारे प्रकाश पार्नु भएको थियो । रामग्रामलाई ध्यान केन्द्रका रुपमा विकास गर्न लागेको बताउँदै नगरप्रमुख यादवले समग्र रामग्राम स्तूपको पर्यटन प्रवद्र्धन र यसको प्रचार प्रसारका लागि चिनियाँ टोलीको महत्वपूर्ण सहयोग रहने विश्वास व्यक्त गर्नुभयो ।

अवलोकनपछि चिनियाँ टोलीसँगै नगरप्रमुख, अन्य जनप्रतिधि र उपस्थित सवै सहभागीले स्तूप परिसरमा दीप प्रज्ज्वलन गरेका थिए ।

प्रकाशित मिति: सोमबार, साउन २६, २०८२ १७:३३

प्रतिक्रिया दिनुहोस्