परासी । विश्व सम्पदा दिवसको अवसरमा शनिवार नवलपरासीमा “सम्पदा साईकल यात्रा २०८३” सम्पन्न भएको छ । “स्वास्थ्य र सम्पदाः कायम गरौं प्राकृतिक हराभरा” भन्ने नाराका साथ आयोजित साईकल यात्रामा झण्डै २०० जना साईकल यात्रीहरूको सहभागिता रहेको थियो ।
नवलपरासी साईकल राइडर्स क्लब, सुनवलको आयोजनामा सम्पन्न उक्त यात्रा सुनवल नगरपालिका स्थित कृष्णधामबाट सुरू भई रामग्राम र बर्दघाट नगरपालिकाका विभिन्न धार्मिक तथा पर्यटकीय क्षेत्रहरू हुँदै पुनः सुनवलमै समापन गरिएको छ । करिब ७७ किलोमिटर लामो यात्रामा सहभागीहरूले बुद्धचोक, रामग्राम स्तूप, भटौलिया, बुद्धमंगलताल, कञ्चनकुटी, बर्दघाट बजार, भूमही, बाबाबर्दगोरिया र किर्तिपुर लगायतका क्षेत्रहरूको अवलोकन गरेका थिए ।
कार्यक्रमको शुभारम्भ गर्दै लुम्बिनी प्रदेश सभा सदस्य एवं पूर्वमन्त्री खड्ग बस्नेतले स्थानीय सम्पदाको प्रचार–प्रसार गरी अन्तर्राष्ट्रिय स्तरमा चिनाउनुपर्ने आवश्यकता औंल्याउनुभयो। उहाँले सम्पदाको संरक्षण र विकास स्थानीय समुदायको प्रमुख दायित्व भएको बताउँदै सुनवलको महलपोखरी क्षेत्रको विकासमा विशेष ध्यान दिनुपर्ने उल्लेख गर्नुभयो।
साईकल यात्रा रामग्राम प्रवेश गरेपछि लुम्बिनी प्रदेशका साँसद बैजनाथ जैसवालले सहभागीहरूलाई स्वागत गर्दै स्वागत गेटदेखि बुद्धचोकसम्म साईकलमै सहभागी हुनुभयो। सो अवसरमा उहाँले स्थानीय सम्पदाको संरक्षण र विकासमा सबैको साझा जिम्मेवारी रहेको बताउनुभयो ।
रामग्राम नगरपालिकाकी उपप्रमुख संझना चौधरीले रामग्राम स्तूपमा साईकल यात्रीहरूलाई स्वागत गर्दै स्तूपको संरक्षण र विकासका लागि सबैले हातेमालो गर्नुपर्ने धारणा व्यक्त गर्नुभयो। उहाँले लुम्बिनी क्षेत्रसँग जोडिएका पालिकाहरूमा “ग्रेटर लुम्बिनी डेभलपमेन्ट परियोजना” सञ्चालन हुने क्रममा रहेको जानकारी दिँदै यसले रामग्रामको विकासमा थप टेवा पुग्ने विश्वास व्यक्त गर्नुभयो ।
रामग्राम स्तूपमा आयोजित कार्यक्रममा रामग्राम विकास कोषका सदस्य एवं पत्रकार बेचु गौंडले भगवान गौतम बुद्धसँग सम्बन्धित अष्टधातु रहेको ऐतिहासिक स्थल रामग्राम स्तूपको महत्वबारे प्रकाश पार्नुभयो ।
त्यसैगरी, बर्दघाट नगरपालिका प्रमुख शम्भुलाल श्रेष्ठले वडा नं. १३ स्थित बुद्धमंगलतालमा साईकल यात्रीहरूलाई स्वागत गर्दै जिल्लाभित्र रहेका धार्मिक तथा पर्यटकीय सम्पदाको संरक्षण, प्रवद्र्धन र विकासका लागि योजनाबद्ध पहल भइरहेको जानकारी दिनुभयो । उहाँले सम्पदा संरक्षणमा सहकार्यको आवश्यकता औंल्याउनुभयो ।
साईकल यात्राले स्थानीय सम्पदाको प्रवद्र्धन, स्वास्थ्य सचेतना र वातावरण संरक्षणका सन्देश फैलाउन महत्वपूर्ण भूमिका खेलेको क्लवका सचिव बासुदेव पौडेलले बताउनु भयो । साईकल यात्रामा नवलपरासीसँगै नवलपुर, रुपन्देही र पाल्पाका साइकल राइडरहरुको सहभागिता रहेकोे क्लबका सदस्य विष्णु खड्काले नेपालीचेली अनलाईनलाई बताउनुभयो ।
