नेपाल पत्रकार महासंघ नवलपरासीमा सुविधा सम्पन्न सचिवालय र पुस्तकालय निर्माण गरिँदै

स्थानीय सेरोफेरो

Home
स्थानीय सेरोफेरो
नेपाल पत्रकार महासंघ नवलपरासीमा सुविधा सम्पन्न सचिवालय र पुस्तकालय निर्माण गरिँदै

नेपाल पत्रकार महासंघ नवलपरासीमा सुविधा सम्पन्न सचिवालय र पुस्तकालय निर्माण गरिँदै

नवलपरासी । देशकै पहिलो र गौरवपूर्ण इतिहास बोकेको नेपाल पत्रकार महासंघ नवलपरासीको जिल्ला शाखा भवन अब थप सुविधा सम्पन्न बन्ने दिशातर्फ अघि बढेको छ । वि.सं. २०५१ सालमा शाखाको सदस्य रहनुभएका स्व.कृष्णबहादुर कार्कीको सपना स्वरुप स्थापना भएको शाखा भवन अहिले विभिन्न निकायको सहयोगमा सुविधा सम्पन्न सचिवालय र पुस्तकालय निर्माणको अन्तिम चरणमा पुगेको हो ।

दुई तले भवनको पहिलो तलामा २ व्यवसायिक सर्टर सहितको सभाहल र माथिल्लो तलामा महासंघको सचिवालय र पुस्तकालय निर्माण गरिएको छ । सचिवालय यसअघि नै व्यवस्थित गरिएको थियो भने पुस्तकालय भवन निर्माण अन्तिम चरणमा रहेको शाखाका सभापति केशव पराजुलीले जानकारी दिनुभयो ।

पुस्तकालय भवन प्रतिनिधि सभाका निबर्तमान साँसद एवं पूर्वमन्त्री ध्रुवबहादुर प्रधानको सहयोगमा बन्न लागेको हो । पूर्वमन्त्री प्रधानले चालु आ.ब. २०८२।०८३ मा आफ्नो साँसद विकास कोषबाट महासंघको पुस्तकालय भवन निर्माणका लागि २० लाख रकम छुट्याइदिनु भएको थियो ।

यस्तै लुम्बिनी प्रदेशका पूर्व मन्त्री एवं साँसद खड्ग बस्नेतले सचिवालयको व्यवस्थापन र आधुनिक पुस्तकालय निर्माणकालागि चालु आर्थिक बर्षमा १० लाख रकम विनियोजन गर्नु भएको छ । सो रकमबाट महासंघले सुविधा सम्पन्न सचिवालय र पुस्तकालय व्यवस्थापन गर्ने जनाएको छ ।

वि.सं. २०४७ साल कार्तिक २५ गते संस्थापक अध्यक्ष भूपेन्द्रप्रसाद शर्मा भट्टराईको अध्यक्षतामा नेपाल पत्रकार महासंघ नवलपरासी गठन भएको थियो । सचिवालय भवन र पुस्तकालय निर्माणको दीर्घकालिन सोंच बनाएर पूर्व अध्यक्ष स्व.कृष्णबहादुर कार्कीले २०५६ सालबाट थालनी गर्नु भएको भवन निर्णाणको काम झण्डै २६ बर्षपछि पूराहुन लागेको छ ।

प्रकाशित मिति: मंगलबार, फागुन १९, २०८२ ०६:०७

प्रतिक्रिया दिनुहोस्