सरावल गाउँपालिकाले आगामी आर्थिक वर्ष २०८३। ०८४ का लागि ५३ करोड ५३ लाख ९६ हजार रुपैयाँको बजेट सार्वजनिक गरेको छ । १८ औं गाउँ अधिवेशनमा प्रस्तुत बजेटमा कृषि, शिक्षा, स्वास्थ्य, पूर्वाधार विकास तथा सुशासनलाई प्राथमिकतामा राखिएको छ । गाउँपालिकाका अध्यक्ष सुखाडि प्रसाद चौधरीलको अध्यक्षतामा उपाध्यक्ष बासमती हरिजनले बजेट प्रस्तुत गर्नु भएको हो ।
कुल विनियोजनमध्ये चालुतर्फ ३२ करोड ९९ लाख ६४ हजार ५५५ रुपैयाँ अर्थात् ६१.६३ प्रतिशत र पुँजीगततर्फ २० करोड ५४ लाख ३१ हजार ४४५ रुपैयाँ अर्थात् ३८.३७ प्रतिशत बजेट विनियोजन गरिएको उपाध्यक्ष हरिजनले जानकारी दिनुभयो ।
उपाध्यक्ष हरिजनले आगामी आर्थिक बर्षको बजेट कार्यान्वयनको लक्ष्य अस्पताल भवन निर्माण, प्रमुख प्रशासकीय भवन, वडा कार्यालयको लागि जग्गा प्राप्ती, हरियाली प्रवद्र्धन र पालिका भित्रका पर्यटकीय क्षेत्रको प्रचार प्रसारमा केन्द्रीत रहेने बताउनु भयो ।
आगामी आर्थिक बर्षको बजेटले आर्थिक विकास क्षेत्रतर्फ २ करोड १५ लाख ४७ हजार रुपैयाँ छुट्याइएको छ । गाउँपालिकाले कृषिजन्य उत्पादन वृद्धि गर्न कृषकलाई कृषि औजार, बिउ तथा जैविक मलमा सहुलियत उपलब्ध गराउने जनाएको छ। पशुबिमा कार्यक्रमलाई निरन्तरता दिँदै किसानलाई सूचीकृत गरी किसान परिचयपत्र वितरण गरिने नीति लिइएको छ ।
सामाजिक विकास क्षेत्रका लागि २४ करोड २२ लाख ५८ हजार २०० रुपैयाँ विनियोजन गरिएको छ । विद्यालयमा दिवा खाजा कार्यक्रमलाई निरन्तरता दिँदै शैक्षिक गुणस्तर सुधार, विद्यालय पूर्वाधार निर्माण तथा प्रविधिमैत्री शिक्षाका कार्यक्रम सञ्चालन गर्न १ करोड रुपैयाँ छुट्याइएको छ । उत्तम पोषण योजना तथा गर्भवती महिलालाई पोषण झोला वितरण कार्यक्रमलाई समेत निरन्तरता दिइने भएको छ । महिला स्वास्थ्य स्वयंसेविकालाई प्रदान गरिँदै आएको प्रोत्साहन भत्ता वृद्धि गरी मासिक ३ हजार रुपैयाँ पुर्याइएको छ ।
पूर्वाधार विकासतर्फ १४ करोड ६५ लाख रुपैयाँ विनियोजन भएको छ । यसअन्तर्गत प्रमुख प्रशासकीय भवन निर्माणका लागि १ करोड रुपैयाँ छुट्याइएको छ भने गाउँपालिकाभित्रका सडकको स्तरोन्नति, कालोपत्रे, आरसीसी तथा पिसिसी निर्माण कार्यलाई निरन्तरता दिइने जनाइएको छ । आगामी वर्ष १५ शैयाको अस्पताल निर्माण कार्य सुरु गरिने भएको छ ।
बाढी नियन्त्रण तथा सरसफाइ कार्यक्रमलाई निरन्तरता दिइने तथा पुसौली–भुजवा सडक विस्तारका लागि २० लाख रुपैयाँ विनियोजन गरिएको छ। वन, वातावरण तथा विपद् व्यवस्थापन क्षेत्रका लागि ७० लाख ५० हजार रुपैयाँ बजेट छुट्याइएको छ । फोहोर व्यवस्थापनका लागि छिमेकी पालिकासँगको सहकार्यमा व्यवस्थित डम्पिङ साइट निर्माण प्रक्रिया अघि बढाइने जनाइएको छ।
प्रधानमन्त्री रोजगार कार्यक्रमको निरन्तरताका लागि नेपाल सरकारको सशर्त अनुदानतर्फ ११ लाख रुपैयाँ विनियोजन गरिएको छ भने सुशासन, कार्यालय सञ्चालन तथा प्रशासनिक खर्चका लागि १२ करोड ८ लाख ४० हजार रुपैयाँ छुट्याइएको छ।
