परासी । पश्चिम नवलपरासीको रामग्राम नगरपालिकामा निर्माण सम्पन्न भएको रामग्राम रङ्गशालाको आज एक समारोहका बीच समुद्घाटन गरिएको छ । नगरप्रमुख धनपत यादवले रामग्राम नगरपालिका–४ मा निर्माण गरिएको रङ्गशालाको उद्घाटन गर्नुभएको हो ।
रामग्राम नगरपालिकाको गौरवको आयोजनाका रूपमा रहेको रङ्गशालाको निर्माण २०७९ सालदेखि सुरु गरिएको थियो । झण्डै ५ करोड १० लाख रुपैयाँको लागतमा निर्माण सम्पन्न भएको रङ्गशालामा ६३० दर्शक क्षमताको प्याराफिट, २४ वटा सटर तथा खेलाडीका लागि चेन्जिङ रुम निर्माण गरिएको छ ।
उद्घाटन समारोहलाई सम्बोधन गर्दै नगरप्रमुख यादवले नगरभित्रका खेलाडीहरूको संरक्षण, खेलकुद प्रतिभाको विकास र समग्र खेलकुद क्षेत्रको प्रवद्र्धनका लागि नगरपालिकाले खेलकुद पूर्वाधार निर्माणलाई प्राथमिकता दिएको बताउनुभयो ।
उहाँले आफ्नो कार्यकालमा नगरभित्र विभिन्न भौतिक संरचनाहरू निर्माण सम्पन्न भएको उल्लेख गर्दै तीनवटा वडा कार्यालय भवन, एउटा रङ्गशाला तथा एउटा होमस्टेसहितको सांस्कृतिक भवन निर्माण भई सञ्चालनमा आएको जानकारी दिनुभयो ।
जिल्लाकै पहिलो बहुमुखी क्याम्पस पाली बहुमुखी क्याम्पसको छेउमा निर्माण गरिएको रङ्गशालाले स्थानीयस्तरमा खेलकुद गतिविधि सञ्चालन तथा खेलाडीको क्षमता विकासमा महत्वपूर्ण योगदान पुर्याउने अपेक्षा गरिएको छ ।
कार्यक्रम रामग्राम नगरपालिका वडा नम्बर ४ का अध्यक्ष मदन यादवको अध्यक्षतामा सम्पन्न भएको हो। कार्यक्रममा नगर उपप्रमुख सम्झना चौधरीले स्वागत मन्तव्य व्यक्त गर्नुभएको थियो ।
कार्यक्रममा राष्ट्रिय स्वतन्त्र पार्टीका जिल्ला सभापति रवि पाण्डे, नेपाली कांग्रेसका कार्यवाहक सभापति विक्रम यादव, राष्ट्रिय प्रजातन्त्र पार्टीका जिल्ला अध्यक्ष रामभवन यादव, जनमत पार्टीका जिल्ला अध्यक्ष बीजी चौधरी, जनता प्रगतिशिल पार्टीका जिल्ला अध्यक्ष राधेरमण पाण्डे, जिल्ला क्रिकेट संघका अध्यक्ष कृष्णनारायण श्रेष्ठ र नेपाल पत्रकार महासङ्घ नवलपरासीका कार्यवाहक सभापति विकास अधिकारी लगायतले रङ्गशाला निर्माणले जिल्लाको खेलकुद विकासमा टेवा पुग्ने विश्वास व्यक्त गर्दै शुभकामना मन्तव्य राख्नुभएको सञ्चारकर्मी मोहन पौडेलले जानकारी दिनुभयो ।
यसैबीच दिपावली र छठ पर्वको अवसरमा पारेर आजैदेखि रामग्राम कप क्रिकेट प्रतियोगिताको पनि शुभारम्भ गरिएको छ । रामग्राम किङ्स क्रिकेट क्लवको संयोजनामा प्रतियोगिता आयोजना गरिएको क्लवले जनाएको छ ।
