लुम्विनी प्रदेशका १२ वटा जिल्लाका १०९ पालिका मध्ये पहिलो महिला नगरप्रमुखको रुपमा रहनु भएकी सुनवल नगरपालिकाकी नगरप्रमुख विमला अर्यालले आज शुक्रवार रेडियो अन्तरवार्तामा आफूले गरेका कामकोबारेमा जानकारी गराउनु भएको छ ।
नगरप्रमुख अर्यालले सुशासन, भौतिक पूर्वाधारको विकास, सामाजिक आर्थिक र साँस्कृतिक विकासलाई प्राथमिकतामा राखेर काम गरिएको बताउनु भयो । शिक्षा, स्वास्थ्य, कृषि, पर्यटनमा महत्वपूर्ण उपलब्धी हासिल गरिएको उहाँले जोड दिनु भयो ।
आ.ब.२०७९।०८० मा प्रत्येक चौमासिकमा सार्वजनिक सुनुवाई गर्दै नगरपालिकाले गरेका विकास निर्माण र सेवा प्रवाहवारे नगरवासीलाई जानकारी गराउने काम गरिएको नगरप्रमुख अर्यालले वताउनु भयो । उहाँले सुनवल नगरपालिकाले योजना निर्माणको चरणदेखि योजना सम्पन्न गर्ने बेलासम्म नागरिकको सहभागीता र पारदर्शीतालाई सुनिश्चित गरिएकोमा जोड दिनु भयो ।
सुनवल नगरपालिकाले गत आ.ब.मा ४ वटा वडा भवन निर्माण गरी वडाबाटै सेवा प्रवाहको शुरुवात गरेको छ भने अब केही महिनामै नगरपालिकाको नयाँ सुविधा सम्पन्न भवनबाट सेवा प्रवाहको तयारी भएको पनि नगरप्रमुख अर्यालले बताउनु भयो । १३ वटै वडामा महिला उद्यम विकास केन्द्र संचालन गरिएको साथै सिटिइभिटिसँग समन्वय गरी सीप विकास तालिमहरु संचालन गरिएको बताउनु भयो ।
महिलाहरुलाई आत्मनिर्भर बनाउन महिला साक्षरता कार्यक्रम अन्तगर्त सुनवल नगरपालिकामा महिला विद्यालय संचालन गरिएको जुन निकै प्रभावकारी वन्दै गएको उहाँले बताउनु भयो ।
सामुदायिक रेडियो परासी ९०.२ मेगाहर्जले संचालन गरेको रेडियो कार्यक्रम चासो र चर्चामा शुक्रवार नगरप्रमखु अर्याललाई विभिन्न क्षेत्रका व्यक्तिहरुले खुल्ला प्रश्न पनि गरेका थिए । खुला चौपायाको व्यवस्थापन, हिलाम्मे सडकबाट नागरिकले पाएको सास्ती, सुनवलमा संचालित उद्योग कलकारखानाको व्यवस्थापन र पर्यटन प्रवर्धनसँग जोडिएका प्रश्न गरेको कार्यक्रम प्रस्तोता विकास अधिकारीले बताउनु भयो ।
