नवलपरासीको पहिलो रेडियोको रुपमा स्थापित सामुदायिक रेडियो परासी ९०.२ मेगाहर्जले १६ औं बार्षिकोत्सव मनाएको छ । २०६५ साल जेष्ठ ३ गते परिक्षण प्रसारण गरी २०६५ कार्तिक १७ गते समुदघाटन भएको रेडियो परासीले आज परासीमा भव्य कार्यक्रम गरी १६ औं बार्षिकोत्सव मनाइएको हो ।
परासी सूचना तथा संचार सहकारी संस्था लि.द्धारा संचालित सामुदायिक रेडियो परासीका अध्यक्ष सुमन गोपाल आचार्यको अध्यक्षता र नेपाल सरकारका पूर्व स्वास्थ्य मन्त्री हृदेयस त्रिपाठीको प्रमुख आतिथ्यमा १६ औ बार्षिकोत्सव मनाइएको हो ।
कार्यक्रममा सामुदायिक रेडियो परासीले गएको १५ बर्षमा गरेका काम र प्रगतिको समिक्षा गरेको छ भने कार्यक्रममा उपस्थित सरोकारवालाहरुले यसक्षेत्रमा रेडियो परासीले खेलको भूमिकाको प्रसंशा गरेका छन् ।
१६ औं बार्षिकोत्सवको अवसरमा पूर्व राज्यमन्त्री धनश्याम यादव, लुम्बिनी प्रदेश सभा सदस्य खड्ग बस्नेत, जिल्ला समन्वय समितिका प्रमुख भगौती यादव, सुनवल नगरपालिकाकी नगरप्रमुख बिमला अर्याल, प्रतापपुर गाउँपालिकाका अध्यक्ष उमेशचन्द्र यादव, जिल्ला स्थित विभिन्न राजनीतिक दलका प्रतिनिधिहरुले शुभकामना व्यक्त गरेका थिए । यस्तै कार्यक्रममा आँखा अस्पताल परासीकी अध्यक्ष मन्जु कण्डेल, जिल्ला सहकारी संघका सचिव चण्डीप्रसाद पाण्डे, उद्योग वाणिज्यसंघका केन्द्रीय सदस्य केशव भण्डारी लगायतले बोल्नु भएको हो ।
सामुदायिक रेडियो परासीले बार्षिकोत्सवको अवसरमा गएको ५ बर्षसम्म निरन्तर बार्षिक विज्ञापन दिने विज्ञापनदाता, स्थापनाकालदेखि निरन्तर सहकार्य गर्ने संघसंस्था तथा श्रोता र कर्मचारीलाई सम्मान गरेको छ । रेडियोले कर्मचारी एवं प्राविधिक प्रमुख प्रवचन मगरलाई नगद सहित सम्मान गरेको रेडियो परासीका अध्यक्ष आचार्यले बताउनुभयो ।
कार्यक्रममा सरावलका थारु समूदायको मौलिक साँस्कृतिक प्रस्तुती रहेको थियो भने लिटिल एन्जेल्स मा.वि.परासीले समावेशी साँस्कृतिक कार्यक्रम प्रस्तुत गरेको रेडियो परासीका सहसचिव तोरेन्द्र जि.सीले बताउनु भयो ।
१६ औं बार्षिकोत्सवको अवसरमा साताव्यापी कार्यक्रम गर्दै कार्तिक २३ गते सहकारीको बार्षिक साधारण सभा र अधिवेशन सम्पन्न गर्ने रेडियो परासीका उपाध्यक्ष राजकुमार रेश्मीले जानकारी दिनु भयो ।
