बाल स्वास्थ्यकालागि साझेदारी नेपालको तेश्रो साधारण सभा आज शनिवार परासीमा सम्पन्न भएको छ । जोखिममा रहेका बिरामीलाई स्वास्थ्य उपचारमा सहयोग गर्दै आएको संस्थाले आ.ब.२०७९।०८० को बार्षिक कारोबारको आम्दानी र खर्चको हिसाव साधारण सभा मार्फत सार्वजनिक गर्दै तेश्रो साधारण सभा सम्पन्न गरेको हो ।
संस्थाका अध्यक्ष सुमन गोपाल आचार्यको अध्यक्षतामा भएको साधारण सभामा आ.ब.२०७९।८० को साँगठानिक प्रतिवेदन सचिव गोविन्द न्यौपाने र लेखा परिक्षण प्रतिवेदन कोषाध्यक्ष प्रदिप ज्योति श्रेष्ठले प्रस्तुत गर्नु भएको थियो भने साधारण सभामा प्रस्तुत भएका बार्षिक प्रतिवेदनहरु सर्वसम्मत पास भएका छन् ।
संस्थाले हालसम्म देशभरका ५ सय ९९ जनाको स्वास्थ्य उपचारमा सहयोग गरेको कोषाध्यक्ष श्रेष्ठले जानकारी दिनु भयो । उहाँका अनुसार क्यान्सर, मृगौला रोगी, दुर्घटनामा परि अङ्गभङ्ग भएका, दीर्घरोगी, यौनरोग संक्रमित प्यारालाइसिस जस्ता विरामीहरुको उपचारमा २ करोड २७ लाख ५६ हजार ६२० खर्च भएको छ ।
संस्थाले आ.ब. २०७९।८० मा स्वास्थ्य उपचारकालागि आर्थिक सहयोगसँगै नवलपरासी जिल्लाका ९ वटा विद्यालयका एक हजारभन्दा बढी बालबालिकालाई न्यानो टोपि, सुनवल स्थित लुम्बिनी मा.विका १७ जना बौद्धिक अपाङ्गबालबालिका र रामग्राम १ सहुवाटिकरमा दलित तथा पिछडा वर्गका ८९ जनालाई ट्याक सुट वितरण गरिसकिएको छ । यस्तै संस्थाले रोटरी क्लव अफ नवलपरासीसँगको सहकार्यमा नवलपरासीमा ५ थान ह्वील चेयर वितरण गरिसकेको छ ।
सो अवसरमा सामुदायिक रेडियो परासी ९०.२ मेगाहर्जका नवनिर्वाचित अध्यक्ष राजकुमार रेश्मी, संस्थाका सचिव गोविन्द न्यौपाने, संचालक सदस्य मेघराज गौतम लगायतले बोल्दै संस्थाको उन्नति र प्रगतिको शुभकामना व्यक्त गर्नु भएको थियो ।
यसैबीच संस्थाको सम्पन्न तेश्रो बार्षिक साधारण सभाले कार्तिक १७ गते जाजरकोटमा गएको भुकम्पबाट घाइते भएका बालबालिकाको स्वास्थ्य उपचारकालागि रु. १ लाख सहयोग गर्ने निर्णय गरेको संस्थाका अध्यक्ष सुमन गोपाल आचार्यले नेपाली चेलीलाइ जानकारी दिनु भयो । संस्थाले चालु आबमा स्वास्थ्य शिविर, रक्तदान र विरामीको उचारार्थ आर्थिक सहयोगलाई निरन्तर गर्ने बताइएको छ ।
