पाँच बर्ष पछि रामग्राम नगरपालिकाद्वारा पहिलो पटक सार्वजनिक सुनुवाई सम्पन्न

स्थानीय सरकार

Home
स्थानीय सरकार
पाँच बर्ष पछि रामग्राम नगरपालिकाद्वारा पहिलो पटक सार्वजनिक सुनुवाई सम्पन्न

पाँच बर्ष पछि रामग्राम नगरपालिकाद्वारा पहिलो पटक सार्वजनिक सुनुवाई सम्पन्न

रामग्राम नगरपालिकाले गएको पाँच बर्षपछि पहिलो पटक सार्वजनिक सुनुवाई कार्यक्रम सम्पन्न गरेको छ । प्रत्येक बर्ष बार्षिक नीति तथा कार्यक्रम र बजेटमा समेत सार्वजनिक सुनुवाई कार्यक्रम गर्ने भने पनि सार्वजनिक सुनुवाई भने गर्न सकेको थिएन । गत बैशाखमा भएको स्थानीय तहको निर्वाचन पछि बनेको नयाँ नेतृत्वले सुशासन, जवाफदेहिता र पारदर्शिताकालागि भन्दै प्रथम चौमासिकसम्मको कामबारे जानकारी दिन र सुझाव र गुनासो सुन्न सार्वजनिक सुनुवाई गरेको हो । नगरपालिकाले वडा नं. ११ मा कार्यक्रमको आयोजना गरी विकास निर्माण र दैनिक जसो सम्पादन हुने कामको बारेमा जानकारी दिएको नगरप्रमुख धनपत यादवले बताउनु भयो ।

नगरपालिकाले फोहोरमैला व्यवस्थापनको काम गर्न नसकेको, कृषि कार्यकालागि विउ मलको उपलब्धता, सिचाँईको सुविधा हुन नसकेको जस्ता कुरा जोडदार रुपमा उठाएका थिए । नागरिकले जनप्रतिधिहरुलाई जनताको गास, वास र कपासमा ध्यान केन्द्रीत गर्न समेत आग्रह गरेका छन् । नगरका १८ वटै वडामा सहज खानेपानीको पहुँच बृद्धिकालागि पनि कुरा उठाएका छन् । कार्यक्रममा स्थानीय भवनीशंकर चौधरीले काठमाण्डौका बालेनले जसरी काम गरेका छन् त्यसैगरी काम गर्न नगर प्रमुख यादव र उपप्रमुख चौधरीलाई आग्रह गर्नु भएको छ । खानेपानी र सरसफाइको समस्या, कृषि सडक निर्माण, खेलकुद मैदान निर्माण लगाएतका विषयमा जनप्रतिनिधिलाई गम्भिर भएर काम गर्न नगरवासीले आग्रह गरेका छन् ।

कार्यक्रममा उठेका सवालको जवाफ दिदै नगर प्रमुख यादवले निर्वाचित भएर आएको पाँच महिनामै धेरै कामको थालनी गरेको उल्लेख गर्दे केहि समयमै देखिने गरी नतिजा आउने बताउनुभयो । फोहोरमैला व्यवस्थापनका लागी काम भईरहेको जानकारी दिदै नगर प्रमुख यादवले रामग्राम नगरपालिका वडा नम्बर १ मा ल्यान्ड फिल्ड साईटको काम पनि अगाडी बढेको जानकारी दिनुभयो । जग्गाको कित्ताकाट रोकिएको सन्दर्भमा उठेको जिज्ञासामा नगर प्रमुख यादवले कित्ताकाटको काम सोंचे अनुरुपको सहज नभएको भन्दै त्यसका लागी नगरपालिकाले काम अगाडी बढाएको बताउनुभयो । जटिल विषय भएकाले कार्यपालिका बैठक मार्फत निर्णय गरेर मापदण्ड बनाई पठाई सकिएको नगर प्रमुख यादवले जानकारी दिनुभयो ।
सार्वजनिक सुनुवाईमा बोल्दै नगर उपप्रमुख तथा न्यायिक समिति संयोजक सम्झना चौधरीले न्यायिक समिति मार्फत आफुहरुको क्षेत्राधिकार भित्र रहेर समाजका देखिएका विभिन्न समस्या समाधान गर्दे आएको बतानुभयो । उहाँले नगरभित्रका सबै वडालाई समान विकास गर्ने गरी नगरले ध्यान पुर्याएको बताउदै जनताले त्यस्मा निरन्तर खबरदारी गर्नुपर्नेमा जोड दिनुभयो ।

कार्यक्रममा निमित्त प्रमुख प्रशासकिय अधिकृत रुद्र प्रसाद रेग्मिले नगरले चालु आर्थिक वर्षमा लिएको लक्ष्य र योजनाका बारेमा जानकारी गरानुभएको थियो । अधिकृत रेग्मीले सेवा प्रवाहमा छिटो छरितोपन र सुशासन कायम गर्दे विकास निर्माणको काम समयमै सक्न निरन्तर काम भईरहेको रेग्मिले बताउनुभयो । सार्वजनिक सुनुवाईमा वडा अध्यक्षहरु धनिराम यादव, धनपत यादव, विद्यासागर त्रिपाठी लगाएतले बोल्नुभएको थियो ।

प्रकाशित मिति: बुधबार, मंसिर २८, २०७९ २२:२४

प्रतिक्रिया दिनुहोस्