परासी । रामग्राम नगरपालिका वडा नं. ३ स्थित करेशावारी कृषक बचत तथा ऋण सहकारी संस्था लि.को १६ औं बार्षिक साधारण सभा आज परासीमा सम्पन्न भएको छ । संस्थाका अध्यक्ष मिनवहादुर कुँवरको अध्यक्षतामा र जिल्ला सहकारी संघ लि.का कोषाध्यक्ष हैदर अलि मोमिनको प्रमुख आतिथ्यमा १६ औं बार्षिक साधारण सभा सम्पन्न भएको हो ।
साधारण सभामा अध्यक्षको संस्थागत प्रतिवेदन, कोषाध्यक्षको लेखा प्रतिवेदन, लेखा समितिको लेखा सुपरिवेक्षण प्रतिवेदन तथा चालु आ.ब २०८०।०८१ को बार्षिक कार्ययोजना प्रस्तुत भई सर्वसम्मतले पास भएको संस्थाका व्यवस्थापक रामचन्द्र गौतमले जानकारी दिनु भयो ।
सहकारीले गत आ.ब.२०७९।०८० मा २५ लाख ७३ हजार ३२३ नाफा गर्न सफल भएको छ । संस्थाले गत वर्षमा ७० बर्ष उमेर पुगेका शेयर सदस्यहरु मध्ये ३ जनालाई मासिक १००० का दरले पेन्सन सुविधा दिंदै आएको जनाएको छ । यस्तै सहकारीले शेयर सदस्यहरुको सेवाकालागि विभिन्न ७ प्रकारका राहत कार्यक्रम पनि घोषणा गरेको छ ।
यस्तै सहकारीले कृषि, उद्योग, व्यापार, स्वास्थ्य, शिक्षा र स्वरोजगारका विविध क्षेत्रमा लगानी गर्दै आएको अध्यक्ष कुँवरले जानकारी दिनु भयो । साधारण सभाको उद्घाटन कार्यक्रममा २ जना ७० बर्ष उमेर पुगेका शेयर सदस्यहरुलाई पेन्सन घोषणा तथा संस्थामा आवद्ध २ जना वरिष्ठ अधिवक्ता सुदर्शन पन्त र आनन्द भुषाललाई सम्मान गरिएको थियो ।
कार्यक्रममा रामग्राम नगरपालिकाका सहकारी शाखा प्रमुख रामसुवाष गुप्ता, निजामति कर्मचारीहरुको आधिकारी ट्रेड युनियनका अध्यक्ष अमजद अलि अन्सारी, सामुदायिक रेडियो परासीका अध्यक्ष राजकुमार रेश्मी, प्रवन्ध निर्देशक मेघराज गौतमले शुभकामना मन्तव्य व्यक्त गर्नु भएको संस्थाकी सहायक व्यवस्थापक यमकुमारी सुवेदीले जानकारी दिनुभयो ।
यसैबीच करेशावारी कृषक साकोसको आठौ निर्वाचन कार्यक्रम पनि सकिएको छ । आठौं निर्वाचन कार्यक्रमबाट आगामी ४ बर्षकालागि कर्णवहादुर सुनारको अध्यक्षतामा ११ सदस्यीय सञ्चालक समिति सर्वसम्मत निर्वाचित भएको छ । जसको उपाध्यक्षमा कल्पना खड्का, सचिवमा चिनबहादुर यादव, कोषाध्यक्षमा रामप्रसाद केवट, सहसचिवमा श्रीनिवास पासी, सदस्यहरुमा क्रमशः शिव शंकर हरिजन, सन्तमान श्रेष्ठ, मोहन वि.क, अच्यूत गौतम, पार्वती वि.क, मिनवहादुर कुँवर सर्वसम्मत निर्वाचित हुनु भएको हो ।
यस्तै लेखासमितिको संयोजकमा कुष्णप्रसाद चौधरी, सदस्यहरु क्रमशः गोवर्दन चौधरी र संगिता प्रजापति सर्वसम्मत चयन हुनु भएको निर्वाचन समितिका संयोजक वरिष्ठ अधिवक्ता सुदर्शन पन्तले जानकारी दिनु भयो ।
