परासी । रामग्राम नगरपालिकाले आयोजना गरेको दोस्रो सडक खाना महोत्सवमा दुई दिनको अवधिमा करिब २० लाख रुपैयाँ बराबरको आर्थिक कारोबार भएको छ। २५७० औँ बुद्ध जयन्तीको अवसर पारेर वैशाख १८ र १९ गते आयोजना गरिएको उक्त महोत्सवमा विभिन्न परिकारका करिब पाँच दर्जन स्टलहरू सञ्चालनमा रहेका थिए।
महोत्सवमा लघु, घरेलु तथा साना उद्यमीदेखि ठूला व्यवसायीहरू सम्मको उल्लेखनीय सहभागिता रहेको थियो। सहभागी व्यवसायीहरूले आ–आफ्ना स्टलमार्फत ५ हजारदेखि ६० हजार रुपैयाँसम्मको कारोबार गरेको जानकारी दिएका छन्।
सडक खाना महोत्सवमा थारु, मगर, गुरुङ, क्षेत्री, खस आर्य र मधेशका विभिन्न जातजातिलगायतका मौलिक तथा परम्परागत परिकारहरू प्रस्तुत गरिनुका साथै स्थानीय उत्पादनलाई पनि प्राथमिकता दिइएको थियो। यसले स्थानीय संस्कृति, परम्परा र खानाको पहिचान प्रवद्र्धन गर्न महत्वपूर्ण भूमिका खेलेको आयोजकले जनाएको छ।
रामग्राम नगरपालिका वडा नम्बर ५ स्थित घण्टाघर चोकमा आयोजना गरिएको महोत्सवले परासी तथा आसपासका नागरिकहरूलाई उत्साहित बनाउनुका साथै खानाको माध्यमबाट सांस्कृतिक एकता मजबुत बनाउन सहयोग पुगेको नगरप्रमुख धनपत यादवले बताउनुभयो।
महोत्सवले स्थानीय पर्यटन प्रवद्र्धन, साना व्यवसायको प्रोत्साहन र आर्थिक चलायमान बढाउन समेत टेवा पुर्याएको विश्वास गरिएको छ। आगामी वर्षहरूमा अझ व्यवस्थित र बृहत्तर रूपमा कार्यक्रम सञ्चालन गर्ने योजना नगरपालिकाले अघि सारेको छ।
