परासी । रामग्राम नगरपालिका वडा नं १ मा रहेको परासी खानेपानी तथा सरसफाई उपभोक्ता समितिले खानेपानीको महशुल उठाउन ताकेता गर्दै कडा निर्णय गरेको छ । यहि माघ ५ गतेसम्म खानेपानीको बाँकी महशुल नबुझाएका उपभोक्ताको धारा बन्द गरिदिने र नाम र वाँकी बक्यौता सार्वजनिक गरिदिने सम्मको निर्णय गरेको हो । संस्थाको सम्पन्न छैठौ बार्षिक साधारण सभाले वर्षो देखिको लाखौँ महसुल उपभोक्ताबाट उठाउन बाँकि रहेको जनाएको छ ।
आगामी माघ ५ गतेभित्र वाँकी महशुल भुक्तानी नगरे धारा बन्द गर्दै नाम सार्वजनिक गरिने समितिका अध्यक्ष खगेश्वर पन्थिले बताउनु भयोे । समितिले खानेपानी उपभोग बापतको ४३ लाख २३ हजार ५ सय ८१ रुपैयाँ ग्राहकबाट उठाउन बाँकि रहेको बताएको छ ।
गत आ.ब. २०७९।०८० को साउन मसान्तसम्म ५१ लाख ३८ हजार बक्यौता रहेकोमा चालु आ.व २०८०।०८१ कोे यस अवधिमा ८ लाख १५ हजार बक्यौता महसुल उठेको छ । समितिले अब खानेपानी प्रभावकारी रुपमा वितरण गर्न सक्ने भएपनि महसुल उठाउने कार्यलाई प्राथमिकतामा राखिएको अध्यक्ष पन्थिले बताउनुभयो ।
समितिका अनुसार घरासयी उपभोक्ताको महसुल बक्यौता बढि देखिएको छ । केहि संस्थागत र व्यक्तिगत गरी महसुल नबुझाउने ९ ओटा धारा समितीले यस अघि नै बन्द गरेको छ । परासीमा बस्ने विभिन्न राजनैतिक दलका नेताहरुले नै वर्षोदेखिको महसुल नबुझाएको अध्यक्ष पन्थीले बताउनु भयो ।
छैठौ बार्षिक साधारणको समुद्घाटन समितिले पुष ७ गते गरेको थियो । उक्त दिन साधारण सभाकोलागि कोरम नपुगेपछि पुष १३ गतेकालागि साधारण सभा तय गरिएको थियो । दोश्रो पटक पनि गणपुरक सख्या नपुगेपछि शुक्रवार उपस्थित सदस्यहरुका वीच साधारण सभा सम्पन्न भएको हो ।
साधारण सभामा संस्थागत प्रतिवेदन, आर्थिक तथा लेखापरिक्षण प्रतिवेदन पास भएका छन् । हालसम्म समितिले रामग्राम भित्रका विभिन्न वडाहरुमा दुई ओटा खानेपानी ट्याङ्कि मार्फत १७ सय घरधुरीलाई पानी वितरण गर्दे आएको छ । समितिले आउँदा दिनमा खानेपानीको पाईप विस्तार गरी झन्डै ३ हजार घरधुरीलाई पानी वितरण गर्ने लक्ष्य रहेको समितिका अध्यक्ष खगेश्वर पन्थीले जानकारी दिनु भयो ।
