परासी । शुभलक्ष्मी महिला बहुउद्देश्यीय सहकारी संस्था लि. परासीको १७ औं बार्षिक साधारण सभा आज सम्पन्न भएको छ । सहकारीकी अध्यक्ष जोगकुमारी चौधरीको अध्यक्षता र रामग्राम नगरपालिकाकी कार्यवाहक नगरप्रमुख संझना चौधरीको प्रमुख आतिथ्यमा १७ औ बार्षिक साधारण सभा रामग्राम ७ उजैनीमा सम्पन्न भएको हो ।
साधारण सभाको उद्घाटन गर्दै कार्यवाहक नगप्रमुख चौधरीले महिलाद्धारा संचालित सहकारीले महिला सशक्तिकरणको क्षेत्रमा काम गर्नु पर्ने वताउनु भयो । उहाँले सहकारीले महिलाहरुको सीप विकास र आयमूलक क्षेत्रमा लगानी वढाउन आग्रह गर्नु भयो ।
सम्पन्न साधारण सभाले संस्थाको साँगठानीय प्रतिवेदन, आर्थिक प्रतिवेदनहरु सर्वसम्मत पास गरेको छ । भने चालु आ.ब. २०८०।०८१ को नयाँ कार्ययोजना पनि तयार पारेको छ । संस्थाले गत आ.ब.सम्ममा ३८ लाख ८८ हजार ९३० बराबरको कारोबार गरेको छ । महिलाहरुद्धारा सञ्चालित सहकारीमा ३ सय ४१ जना महिला शेयर सदस्यहरु रहेको बताइएको छ ।
साधारण सभामा जिल्ला सहकारी संघ लि. का संचालन सदस्य पुरन चौधरी, सामुदायिक रेडियो परासीका प्रवन्ध निर्देशक मेघराज गौतम, महादेव कृषि सहकारी सस्थाका अध्यक्ष देवेन्द्र चौधरी, बजरीया बचत तथा ऋण सहकारी लि. की अध्यक्ष शोभादेवी चौधरी, समाजसेवी मन्जु चौधरी लगायतले साधारण सभाको सफलताको शुभकामना व्यक्त गर्नु भएको संस्थाकी सचिव एवं कार्यक्रम संचालक आशा चौधरीले जानकारी दिनु भयो ।
सम्पन्न साधारण सभामा तीन जना असल शेयर सदस्यहरुलाई सम्मान गरिएको थियो । संस्थामा नियमित कारोबार गर्ने रामग्राम १ की ज्ञान्ती यादव, रामग्राम ४ की रावित्री पासी र रामग्राम १० की अन्जनी भरलाई सम्मान गरिएको हो ।
