परासी । रामग्राम वहुउद्देश्यीय सहकारी संस्था लि. रामग्राम १६ को दोश्रो बार्षिक साधारण सभा आज परासीमा सम्पन्न भएको छ । दुरगामी विभिन्न लक्ष्य बोकेर स्थापना भएको सहकारीले आइतबार आज दोश्रो साधारण सभा सम्पन्न गरेको हो ।
कृषकलाई मलखादको उचित व्यवस्था गर्ने, संस्थाका शेयर सदस्यहरुलाई विभिन्न उत्पादनशील क्षेत्रमा क्रियाशिल बनाउने र सीपमूलक क्षेत्रमा लगानी गर्ने उद्देश्य संस्थाले लिएको छ । चालु आ.ब.मै ६ सय सदस्य र शेयरपँुजी १ करोड पुर्याउने लक्ष्य लिइएको संस्थाले जनाएको छ ।
रामग्राम वहुउद्देश्यीय सहकारी संस्था लि. का अध्यक्ष शिबेन्द्र शाहको अध्यक्षता र रामग्राम नगरपालिकाकी कार्यवाहक नगरप्रमुख संझना चौधरीको प्रमुख आतिथ्यमा दोश्रो साधारण सभा सम्पन्न भएको हो । साधारण सभाको समुदघाटन गर्दै कार्यवाहक नगरप्रमुख चौधरीले सहकारीले सदस्यकेन्द्रीत भएर सेवा प्रवाह गर्न आग्रह गर्नु भयो । उहाँले नगरक्षेत्र भित्रका सहकारीहरुलाई नियमन, क्षमताविकास र विशुद्ध सहकारी व्यवसायमा केन्द्रीत हुन निर्देशन गरिएको बताउनु भएको छ ।
साधारण सभाले सचिवको साँगठानीक प्रतिवेदन, कोषाध्यक्षको आर्थिक प्रतिवेदन पास गरेको छ । सहकारीमा हाल २ सय ५० शेयर सदस्य रहेका छन् भने कुल ३१ लाख १५ हजार बढीको कारोबार भएको संस्थाका अध्यक्ष शिबेन्द्र शाहले जानकारी दिनु भयो ।
कार्यक्रममा रामग्राम नगरपालिका वडा नं. १२ का अध्यक्ष लोकवहादुर चौधरी, सामुदायिक रेडियो परासीका प्रवन्ध निर्देशक मेघराज गौतम, स्थानीय युवा रवि पाण्डेय, रामग्राम जेसीजका कानूनी सल्लाहाकार विष्णुराज राव र संस्थाका व्यवस्थापक संन्दिप चौधरी लगायतले शुभकामना मन्तव्य व्यक्त गर्नु भएको थियो ।
