परासी । पाल्हीनन्दन गाउँपालिका ऐ्तिहासिक एवं धार्मिक स्थल पाल्ही भगवती मन्दिरको नामबाट नामांकरण गरिएको छ । पाल्हीनन्दन गाउँपालिका छिमिकी राष्ट्र भारतको सिमानाकासँग जोडिएकोले पनि यसको महत्व अझै बढेको हो । भारतसँगको सिमानाका, विभिन्न वडाहरुमा अवस्थित धार्मिक स्थलहरु र वडा नं. ६ मा रहेको ३६ विगाहा क्षेत्रफलमा फैलिएको नन्दनतालले पाल्हीनन्नदन गाउँपालिकाको एतिहासिकतालाई झल्काएको हो ।
गाउँपालिकाको पूर्वमा सरावल गाउँपालिका, पश्चिममा रुपन्देहीको रोहिणी गाउँपालिका, उत्तर तर्फ रामग्राम नगरपालिका, दक्षिण तर्फ भारतको सिमानाका जोडिएको स्थानमा पाल्हीनन्नदन अवस्थित छ ।
गाउँपालिका भित्रका धार्मिक एवं एतिहासिक स्थलहरुको चर्चा गर्दा वडा नं. १ मा रहेको शहिद जगदिश पासवान (शहिद पासवान २०६४ फागुन महिनाको तराईमधेश आन्दोलनका क्रममा शहिद हुनु भएको हो ।) को शालिक रहेको स्थल, वडा २ मा रहेको धार्मिक स्थल शिवमन्दिर गोपालपुर त्यस्तै अनहरी बहिरी माईको थान सुगौली प्रचलित स्थानहरु हुन् ।
यस्तै वडा नं. ३ मा रहेको मजार थान बेलासपुर, हनुमान मन्दिर कुश्मा, हनुमान मन्दिर पर्सिया र छोट्की कुश्मा मन्दिर प्रचलित धार्मिक स्थलहरु हुन् । यस्तै पाल्हीनन्दन गाउँपालिका वडा नं.४ मा रहेको पाल्ही भगवती मन्दिर पाल्ही, शिवपार्वती दिव्यधाम लोहरौली, कालिथान पाल्ही, देवीमन्दिर बैरवा धार्मिक स्थलहरुको रुपमा प्रचलित रहेका छन् ।
यस्तै वडा नं. ५ को शिवपार्वती मन्दिर गेरमा, राधाकृष्ण मन्दिर विष्णुपुरा पनि पाल्हीनन्दनका महत्वपूर्ण धार्मिक स्थलको रुपमा परिचित छन् । यस्तै वडा नं. ६ को समयमाई मन्दिर सनई, वाइसीदेवी मन्दिर रगरगञ्ज, कोटईमाई राजाबारी, मध्यबाबा सनई र चमारीमाईथान सनई पनि पाल्हीनन्दन गाउँपालिकालाई चिनाउने मूख्य ऐतिहासिक एवं धार्मिक स्थलहरु हुन् ।
