बर्दघाट । २४ सै घण्टा पानी र गरीव किसानलाई निःशुल्क धारा जडान गर्न खानेपानी तथा सरसफाई उपभोक्ताहरुले माग गरेका छन् । उपभोक्ताहरुले खानेपानी संस्थाले दैनिक हुने फजुल खर्च घटाउन आग्रह गर्दै उपभोक्तामूखी बन्न सुझाव दिएका हुन् ।
बर्दघाट नगरपालिकाको पंचनगर खानेपानी तथा सरसफाई उपभोक्ता संस्थाको १३ औं बार्षिक साधारण सभामा उपभोक्ताहरुले यस्तो सुझाव दिएका हुन् । यस्तै संस्थाप्रति प्रतिवद्ध, खानेपानीको ज्ञान भएको र पूर्णसमय खानेपानी क्षेत्रलाई दिनसक्ने व्यक्तिलाई नेतृत्वमा पुर्याउन आग्रह गरेका छन् ।
संस्थाका अध्यक्ष यमबहादुर क्षेत्रीको अध्यक्षता र लुम्बिनी प्रदेशका सभासद विश्वप्रेम पाठकको प्रमुख आतिथ्यमा सोमबार १३ औं बार्षिक साधारण सभा सम्पन्न भएको हो । सो अवसरमा सभासद पाठकले एकतावद्ध भएर सामाजिक काममा अग्रसर भए हरेक काममा सफलता मिल्ने विश्वास व्यक्तगर्नु भयो । उहाँले खानेपानी र सरसफाईलाई उत्तिकै महत्व दिन पनि आग्रह गर्नुभयो ।
कार्यक्रममा बार्षिक प्रगति र आगामी कार्ययोजनाको प्रतिवेदन अध्यक्ष क्षेत्रीले प्रस्तुत गर्नु भएको थियो । यस्तै कोषाध्यक्षको प्रतिवेदन संस्थाका कोषाध्यक्ष सृजना थापा, सचिवको प्रतिवेदन सचिव शरद पौडेल र लेखा सुपरिवेक्षण समितिको प्रतिवेदन संयोजक कर्णवहादुर खत्रीले प्रस्तुत गर्नु भएको थियो ।
खानेपानी संस्थाको १३ औं बार्षिक साधारण सभामा बर्दघाट नगरपालिकाका अध्यक्ष शम्भुलाल श्रेष्ठ, लुम्बिनी प्रदेश खानेपानी महाशाखा प्रमुख गुणनीधि पोख्रेल, वडा नं. ९ का अध्यक्ष चन्द्रकान्त चापागाईं, इन्जिनियर शेषकान्त पाण्डे, खानेपानी उपभोक्ता महासंघ नवलपरासीका उपाध्यक्ष शोभाकान्त कोइराला, संस्थाका पूर्व अध्यक्ष लोमा खनाल वाग्ले, जनकल्याण साकोसका अध्यक्ष कुलदिप आचार्य, खानेपानी संस्थाका उपभोक्ताहरु लालवहादुर खत्री र शुशिला पौडेल, रामनारायण चौधरी लगायतले शुभकामना व्यक्त गर्नु भएको थियो ।
पंचनगर खानेपानी तथा सरसफाई उपभोक्ता संस्थाबाट हाल २३ सय ५५ धरधुरीले खानेपानी उपभोग गरिरहेका छन् । संस्थाले १६ घण्टा खानेपानी वितरण गरेको साथै कार्यक्षेत्र भित्र ५१ किलोमिटर खानेपानी विस्तार गरेको जनाएको छ ।
यस्तै २४ सै घण्टा खानेपानी वितरण, दैनिक पानी परिक्षण, उपभोक्तालाई खानेपानी सुरक्षा योजनामा सहभागी बनाउने र सरसफाईको क्षेत्रमा रचनात्मक कार्यक्रम गर्ने आगामी लक्ष्य रहेको संस्थाका सचिव शरद पौडेलले जानकारी दिनु भयो ।
यसैबीच संस्थाको छैठौ अधिवेशन पनि आजै सम्पन्न हुने संस्थाले जनाएको छ ।
