परासीमा सञ्चालित १५ दिने व्यापार मेला समापन: आर्थिक विकासमा उद्योगी व्यवसायीहरुको महत्वपूर्ण योगदान रहेको चर्चा

अर्थ - वाणिज्य

Home
अर्थ - वाणिज्य
परासीमा सञ्चालित १५ दिने व्यापार मेला समापन: आर्थिक विकासमा उद्योगी व्यवसायीहरुको महत्वपूर्ण योगदान रहेको चर्चा

परासीमा सञ्चालित १५ दिने व्यापार मेला समापन: आर्थिक विकासमा उद्योगी व्यवसायीहरुको महत्वपूर्ण योगदान रहेको चर्चा

परासी । नवलपरासी जिल्लाको रामग्राम नगरपालिकामा सञ्चालित १५ दिने व्यापार मेला आज बुधवार समापन भएको छ । आयोजक उद्योग वाणिज्य संघले एक कार्यक्रमको आयोजना गरी मेला समापन गरेको हो । मेला गत फागुन १६ गतेदेखि शुरु गरिएको थियो ।

Damkal Sewa
नवलपरासी उद्योग वाणिज्य संघका अध्यक्ष ओमप्रकाश अग्रहरीको अध्यक्षता र प्रतिनिधि सभाका साँसद ध्रुववहादुर प्रधानको प्रमुख आतिथ्यमा मेला समापन गरिएको हो । समापनका अवसरमा बोल्दै साँसद प्रधानले सबैभन्दा बढी राजस्व उठ्ने नवलपरासीमा सबैभन्दा कम बजेट पर्ने गरेको भन्दै चिन्ता व्यक्त गर्नु भयो । उहाँले सरकार कुन राजनीतिक दलको छ भन्दा पनि सबैदल एकजुट भएर नवलपरासीको विकासमा लाग्नु पर्नेमा जोड दिनुभयो । साँसद प्रधानले उद्योगी व्यवसायीहरुलाई प्रसंशा गर्दै देशको समग्र आर्थिक विकासमा नवलपरासी जिल्लाका उद्योगी व्यवसायीहरुको महत्वपूर्ण योगदान रहेको चर्चा गर्नुभयो ।

कार्यक्रममा पूर्व गृह राज्यमन्त्री देवेन्द्रराज कँडेलले जिल्लाका समस्याहरु पटक पटक सरकारका प्रतिनिधिहरुलाई राख्ने गरिएको तर छोटो समयमै सरकार परिवर्तन हुँदा उपलब्धी हासिल गर्न कठीन भएको बताउनु भयो । पूर्वराज्य मन्त्री कण्डेलले जिल्लाको विकास गर्न आफ्नो पार्टीभन्दा माथि उठ्नु पर्नेमा जोड दिनुभयो ।
समापन कार्यक्रममा लुम्बिनी प्रदेशसभा सदस्य बैजनाथ जयसवाल, रामग्राम नगरपालिकाकी उपमेयर सम्झना चौधरी, नेपाल उद्योग वाणिज्य महासंघका केन्द्रीय सदस्य केशव भण्डारी, नेपाली कांग्रेस नवलपरासीका उपसभापति विक्रम यादव, लोकतान्त्रिक समाजवादी पार्टीका केन्द्रीय सदस्य पुरन चौधरी, नवलपरासी उद्योग वाणिज्य संघका वरिष्ठ उपाध्यक्ष नगेन्द्र अग्रहरी लगायतले शुभकामना व्यक्त गर्नुभएको संघकी महासचिव तारा आचार्यले जानकारी दिनुभयो ।
मेला समापनको अवसरमा मेला सफल बनाउन सहयोग गर्ने व्यक्ति, संघसंस्था तथा अन्य निकायलाई सम्मान गरिएको थियो । उद्योग वाणिज्य संघले मेलाको कारोबार र अन्य गतिविधिबारे पछि जानकारी दिने बताएको छ ।

galaxy parasi