परासी । ६७ औं राष्ट्रिय सहकारी दिवसको पूर्वसन्ध्यामा सामुदायिक रेडियो परासीले शुक्रवार सहकारीका सरोकारबालाबीच जिल्ला स्तरीय अन्र्तक्रिया कार्यक्रम सम्पन्न गरेको छ । परासी सूचना तथा सञ्चार सहकारी संस्था लि.द्वारा सञ्चालित सामुदायिक रेडियो परासी ९०.२ मेगाहर्जका अध्यक्ष राजकुमार रेश्मीको अध्यक्षता र रामग्राम नगरपालिकाका नगरप्रमुख धनपत यादवको प्रमुख आतिथ्यमा कार्यक्रम गरिएको हो ।
“सहकारीमा सुशासन, प्रविधि र एकीकरण” भन्ने मूल नाराकासाथ कार्यक्रम सञ्चालन गरिएको छ । चैत्र २० गतेलाई लक्षित गरी रेडियोले नवलपरासीका सहकारी संस्था र अवस्था विषयमा व्यापक छलफल चलाएको हो । नवलपरासी जिल्लामा सहकारीको वास्तविक अवस्था थाहापाउने उद्देश्यले जिल्ला स्तरीय अन्र्तक्रिया कार्यक्रम गरिएको अध्यक्ष रेश्मीले बताउनु भयो ।
अन्तरक्रिया कार्यक्रममा बोल्ने बक्ताहरुले तीनै तहका सरकारलाई जिम्मवार वन्न र सहकारी ऐन र नियमावली बमोजिम सञ्चालनका लागि आग्रह गरेका छन् । पछिल्लो समय सहकारीमा देखिएका विकृती र आर्थिक अपचलनका घटनाले सुशासनमा चल्ने सहकारीहरुलाई समेत चुनौती थपिएको उनीहरुले बताएका हुन् ।
रामग्राम नगरपालिका सहकारी शाखा अधिकृत रामसुभाष गुप्ता र बर्दघाट नगरपालिकाकी सहकारी शाखा अधिकृत सृजना अर्यालले नगर भित्रका सहकारीको अवस्था र नगरपालिकाले गर्दै आएका कामको विषयमा प्रस्तुतीकरण गर्नुभएको थियो । कार्यक्रममा सुनवल नगरपालिका र ४ वटै गाउँपालिकालाई पनि पत्राचार सहितको पहल गरेपनि उनीहरुको उपस्थिति भने हुन सकेको थिएन् ।
कार्यक्रममा रामग्राम नगरपालिकाकी उपप्रमुख सम्झना चौधरी जिल्ला सहकारी संघका सचिव चण्डिप्रसाद पाण्डेय, लुम्बिनी सुनवल बचत तथा ऋण सहकारी संस्थाका अध्यक्ष लेखनाथ खरेल, परासी आर्दश बहुमुखी सहकारी संस्थाका अध्यक्ष पुरन चौधरी, जिल्ला बचत संघका अध्यक्ष राजनकुमार आचार्य, जिल्ला दुग्ध सहकारी संघका अध्यक्ष पूर्णप्रसाद तिमिल्सीना, जिल्ला कृषि संघका उपाध्यक्ष पशुपती न्यौपाने, लुम्बिनी प्रदेशभरका सहकारी म्यानेजर्स क्लवका प्रदेश अध्यक्ष टिकाराम तिमिल्सीना, महादेव कृषि सहकारी संस्थाका अध्यक्ष देवेन्द्र चौधरी, सामुदायिक रेडियो परासीका सल्लाहकार रामजी ज्ञवाली, प्रबन्ध निर्देशक मेघराज गौतम, स्टेशन म्यानेजर बिकास अधिकारी लगायतले बोल्नुभएको थियो ।
सामुदायिक रेडियो परासीले आउदो चैत्र २० गते सहकारी बुलेटिन “हातेमालो सहकारी खवर” प्रकाशन गर्ने गरी तयार थालिएको प्रवन्ध निर्देशक गौतमले जानकारी दिनु भयो ।
