परासी । सरावल गाउँपालिकाले सञ्चालन गरेको २१ दिने व्यवसाय दर्ता शिविरबाट १ सय २८ नयाँ व्यवसाय दर्ता भएका छन् । विभिन्न १६ प्रकृतिका व्यवसाय दर्ता भएको गाउँपालिकाले जनाएको छ । ७ वटै वडामा भएको तथ्यङ्कलाई हेर्दा वडा नं. १ मा १२ वटा, वडा नं. २ मा २६ वटा, वडा नं. ३ मा २५ वटा, वडा नं. ४ मा ११ वटा, वडा नं. ५ मा १६ वटा, वडा नं. ६ मा ९ वटा र वडा नं. ७ मा १८ वटा नयाँ व्यवसाय दर्ता गरिएको हो । सञ्चालन भएको नयाँ व्यवसाय दर्ता अभियानबाट करिव १ लाख ५० हजार वढी राजश्व संकलन भएको छ ।
विभिन्न १६ वटा प्रकृतिका व्यवसाय मध्ये ८८ वटा किराना पसल, खाजा र नास्ताका १०, मासु पसल ८, मोटरसाइकल मर्मत ५, फेक्सी ५, टेलरिङ्ग २ र अन्य १।१ वटा गरी १ सय २८ वटा नयाँ फर्म दर्ता गरिएको गाउँपालिकाका उद्योग विकाश शाखा प्रमुख राजन लम्सालले जानकारी दिनुभयो ।
यसअघि घरेलु तथा साना उद्योग कार्यालयले सरावल गाउँपालिकामा ५ लाखसम्म पूँजी भएका लघु, घरेलु तथा साना उद्योग र व्यवसाय ४ सय १३ वटा हस्तान्तरण गरेको थियो । यसरी हेर्दा नयाँ १ सय २८ र पुरोनो गरी सरावल गाउँपालिकामा हाल ५ सय ४१ वटा उद्योग तथा व्यवसायहरु सञ्चालनमा रहेको तथ्याङ्क छ ।
सरावल गाउँपालिकाले गत फागुन ३ गतेदेखि चैत्र ९ गतेसम्म २१ दिने व्यवसाय दर्ता शिविर सञ्चालन गरेको हो । ५ लाखसम्म स्थिरपूँजी भएका उद्योग तथा व्यवसायको दर्ता र नविकरणका लागि गाउँपालिकाले शिविर सञ्चालन गरेको हो ।
