आज गणतन्त्र दिवस, २०६५ साल जेष्ठ १५ गते एक शताब्दीको लामो राजतन्त्रको अन्त्य भई नेपालमा संङ्घीय लोकतान्त्रीक गणतान्त्रिक मूलुक घोषणा गरिएको थियो । आज मुलुकमा गणतन्त्र स्थापना भएको १६ बर्ष पुगेको छ । १० बर्षे सशत्र जनयुद्ध र ०६२।२०६३ को जनआन्दोलनको जगमा नेपालमा गणतन्त्रको घोषणा भएको हो । त्यसैले जेष्ठ १५ आम नेपालीका लागि एउटा विशेष दिन, स्वतन्त्र र व्यवस्था परिवर्तनको दिन पनि हो ।
त्यही दिनको संझनामा आज देशभर विभिन्न कार्यक्रमको आयोजना गरी गणतन्त्र दिवस मनाइएको छ । सरकारले आज सार्वजनिक बिदा नै दिएर गणतन्त्रको सम्मान, गौरव र उपलब्धिको रुपमा लिने गरिएको छ ।
यसैबीच पश्चिम नवलपरासीमा गणतन्त्र दिवस मूल समारोह समितिले प्रभातफेरीका आयोजना गरी गणतन्त्र दिवस मनाएको छ । सदरमुकाम परासीको बुद्धचोकमा भेला भई नगर परिक्रमा गरिएको थियो ।
जिल्ला समन्वय समितिका प्रमुख भगौती यादवको अगुवाईमा भएको प्रभात फेरीमा सरकारी एवं गैर सरकारी निकाय, नेपाली सेना, नेपाल प्रहरी, सशस्त्र प्रहरी बल, विभिन्न विद्यालय, खेलाडि, जिल्ला स्थित गरैरसरकारी संघसंस्थाहरुको प्रभातफेरीमा सहभागीता रहेको थियो । नेपाल सेनाको पंचेवाजा सहितको र्यालीले गणतन्त्र दिवस विशेष कार्यक्रमको रौनक अझ बढाएको थियो ।
प्रभातफेरी पछि बुद्धचोकमा भएको कोण सभालाई सम्बोधन गर्दै लुम्बिनी प्रदेश सभाका सदस्य बैजनाथ कलवारले व्यवस्था फेरीए पनि जनताको अवस्था फेर्न नसकिएको बताउनु भयो । कार्यक्रममा रामग्राम नगरपालिकाका नगरप्रमुख धनपत यादव, प्रमुख जिल्ला अधिकारी सुरेश पन्थी, स्वाथ्य कार्यालयका प्रमुख ओमप्रकाश पन्थी, नेपाली काँग्रेसका कार्यवाहक सभापती विक्रम यादवलगायतले बोल्दै गणतन्त्र दिवसको शुभकामना व्यक्त गर्नु भएको थियो ।
आजै मूल समारोह समितिका संयोजक भगौती यादवको अगुवाईमा पृथ्वी चन्द्र अस्पतालका विरामीहरु र आदर्श माध्यमिक विद्यालयका दृष्टि विहिन वालबालिकाहरुलाई फलफूल वितरण गरिएको छ । साँझ विभिन्न कार्यालय तथा नागरिक तहबाट दिपप्रज्जवलन गर्ने कार्यक्रम पनि राखिएको छ ।
