परासी । नवलपरासी जिल्लाका ७ पालिका मध्ये ६ पालिकाहरुले नीति, कार्यक्रम र बजेट ल्याएका छन् । स्थानीय सरकार संचालन ऐन, २०७४ र अन्तर सरकारी वित्त व्यवस्थापन ऐन अनुसार प्रत्येक बर्षको असार १० गते नीति, कार्यक्रम र बजेट ल्याउने प्रावधान छ । असार १० गतेभित्र आगामी आर्थिक वर्षको आय र व्ययको अनुमान पेश नगरेमा र असार १५ गतेसम्म विद्युतीय अनलाइन पोर्टलमा प्रविष्ट नगरेमा ५ अंक काटिन्छ । जसले पालिकाका लागि ५ देखि १० लाखसम्म श्रोतको कमी हुन सक्छ ।
जसअनुसार जिल्लाका ७ वटा पालिकाले आ.व. ०८१÷०८२ का लागि बजेट सार्वजनिक गरेका हुन् । ६ वटा पालिकाहरुको कुल बजेट ५ अर्ब ५१ करोड ८३ लाख रहेको छ । तर ऐनको प्रावधान अनुसार ६ पालिकाहरुले बजेट प्रस्तुत गरेपनि पाल्हीनन्दन गाउँपालिकाले भने बजेट ल्याउन बाँकी रहेको छ । जनप्रतिनिधिहरुको आपसी असमझदारीका कारण बजेट ल्याउन बाँकी रहेको बताइएको छ ।
बजेट ल्याएका पालिकाहरुमध्ये सबैभन्दा बढी रामग्राम नगरपालिकाको १ अर्ब ४२ करोड ४० लाख रहेको छ । सबैभन्दा कम बजेट सरावल गाउँपालिकाले ५३ करोड ४८ लाखको बजेट ल्याएकोछ ।
रामग्राम नगरपालिकाले १४ औं नगर सभामा नीति, कार्यक्रम तथा बजेट प्रस्तुत गर्दै संघीय सरकारको ६५ करोड ३७ लाख, प्रदेश सरकारको समपुरक र शसर्त अनुदान ३ करोड ४९ लाख रहेको जानकारी दिएको छ ।
सुनवल नगरपालिकाले १५ औ नगर सभामा आव ०८१÷०८२ का लागि कुल १ अर्ब २७ करोड ३८ लाखको बजेट प्रस्तुत गरेको छ । आगामी बर्षको लागि संघीय सरकार वित्तीय हस्तान्तरण, प्रदेश सरकार र राजश्व वाँडफाँड तथा सामाजिक सुरक्षा कार्यक्रमबाट १ अर्ब ३ करोड ७७ लाख रहेको उल्लेख छ । त्यस्तै आन्तरिक आम्दानीतर्फ आन्तरिक स्रोतबाट २० करोड २१ लाख र गत वर्षको मौज्दात ३ करोड ३९ लाख रहेको छ। त्यस्तै खर्चतर्फ पुँजीगत खर्चतर्फ ५२ करोड ६४ लाख र चालु खर्च तर्फ ७४ करोड ७३ लाख रहेको छ।
बर्दघाट नगरपालिकाले आगामी वर्षका लागि कुल ११ करोड ७८ लाखको बजेट विनियोजन गरेको छ। संघीय सरकारको ६५ करोड २५ लाख, प्रदेश सरकारको ४ करोड ३५ लाख र आन्तरिक स्रोतको २२ करोड १७ लाख रकम रहेको नगरपालिकाले जनाएको छ ।
प्रतापपुर गाउँपालिकाले आव ०८१÷०८२ को लागि कुल ७१ करोड ७९ लाख ३४ हजारको बजेट ल्याएको छ। गाउँपालिकाले चालु तर्फ ४७ करोड ४७ लाख र पुँजिगत तर्फ २४ करोड ३२ लाख रहेको बताएको हो । जसमध्ये संघीय सरकारबाट १३ करोड ३८ लाख, शसर्त अनुदान पुँजिगततर्फ ३ करोड ४८ लाख, विशेष अनुदान १ करोड र समपुरक अनुदान १ करोड ५० लाख रहेको जनाएको हो ।
त्यस्तै प्रदेश सरकारबाट वित्तीय समानिकरण अनुदानतर्फ ९४ लाख २९ हजार र समपुरक अनुदानतर्फ ७० लाख रहेको छ। त्यसैगरी राजस्व बाँडफाँडबाट प्राप्त हुने आम्दानीमा संघीय सरकार बाट ११ करोड ३ लाख, प्रदेश सरकारबाट ५३ लाख १५ हजार र स्थानीय सरकारबाट ५० लाख रहेको बजेटमा उल्लेख छ।
सुस्ता गाउँपालिकाले आगामी वर्षका लागि कुल ६५ करोड बजेट विनियोजन गरेको छ। जसमा संघीय समानिकरणबाट ६ करोड १७ लाख, संघीय शसर्तबाट १६ करोड ३ लाख ८६ हजार, संघीय शिर्षक र समपुरकबाट १ करोड ९६ लाख रहेको छ। गाउँपालिकाले प्रदेश समानिकरणबाट ६३ लाख ५५ हजार, प्रदेश शसर्तबाट ४० लाख ५० हजार र प्रदेश समपुरकबाट ५० लाख बजेट रहेको जनाएको छ ।
यसैबीच सरावल गाउँपालिकाले आगामी बर्ष २०८१।०८२ कालागि कुल ५३ करोड ४८ लाख ७१ हजारको बजेट ल्याएको छ । गाउँपालिकाले चालुतर्फ ३१ करोड ९३ लाख र पूँजीगततर्फ २१ करोड ५५ लाख विनियोजन गरिएको छ । आगामी बर्ष संघीय सरकार, सशर्त अनुदान, पूँजीगत, समपुरक अनुदान लगायतमा ३३ करोड ९३ लाख र प्रदेश सरकारको विभिन्न शीर्षकमा २ करोड ५० लाख रहेको बताइएको छ ।
