परासी । मानव ओसारपसार र लागूऔषध दुर्वेशन न्यूनिकरण गर्न पाल्हीनन्दन गाउँपालिका र छिमेकी देश भारतका प्रतिनिधिहरुले सामुहिक प्रतिवद्धता व्यक्त गरेका छन् । बुधवार पाल्हीनन्दन गाउँपालिका वडा नं. १ रमपुरवामा भएको कार्यक्रममा दुबै देशका सामाजिक संघसंस्थाले यस्तो प्रतिवद्धता व्यक्त गरेका हुन् ।
पाल्हीनन्दन गाउँपालिका स्तरीय बहुसरोकारवाला फोरमकी अध्यक्ष माधुरी लिम्बुको अध्यक्षता र गाउँपालिकाका अध्यक्ष बैजुप्रसाद गुप्ताको प्रमुख आतिथ्यमा कार्यक्रम गरिएको हो । सो अवसरमा अध्यक्ष गुप्ताले आगामी दिनमा नेपाल र भारतका जिल्ला स्तरका प्रतिनिधिहरुसँग काम गर्ने बताउनु भयो । उहाँले मानव तस्कर र लागूऔषध दुर्वेशन न्यूनिकरण गर्न अभिभावकहरु वढी जिम्मवार बन्नु पर्ने बताउनु भयो । अध्यक्ष गुप्ताले दुर्वेशनमा फँसेकालाई कुटपिट गरेर भन्दा पनि सकारात्मक र सुक्ष्म ढंगले समस्याको समाधान खोज्नु पर्नेमा जोड दिनु भयो ।
कार्यक्रममा उपाध्यक्ष फातिमा खातुन अन्सारीले समस्याको जड बेरोजगारी भएकोले आम नागरिकलाई व्यापक जनचेतना जगाउनु पर्ने धारणा व्यक्त गर्नु भयो ।
कार्यक्रममा पूर्वान्चल ग्रामीण सेवा समिति निचलौल, महाराजगन्जका प्रतिनिधि श्रवण कुमारले मानव ओसारपसारमा कमि ल्याउन दुवैदेशका अधिकारीहरुको आपसी समझदारी बनाउनु पर्ने बताउनु भयो । उहाँले मानव तस्करी र लागूऔषधको कारोबारलाई न्यूनिकरण गर्न दुवैदेशले साझा कार्ययोजना तयार पार्नु पर्ने धारणा राख्नु भयो ।
यस्तै कार्यक्रममा भारतीय संस्थाकी प्रतिनिधि जगरानीले दुवैदेशका संस्थाहरुले सहकार्य गरी काम गरेको भएतापनि तस्करहरु हामीभन्दा बाठा भएकोले न्यूनिकरणकालागि सबै एकै ठाउँमा उभिनु पर्ने बताउनु भयो ।
कार्यक्रममा पाल्हीनन्दन गाउँपालिकाका वडा नं. १, २, ३ र ५ का वडाअध्यक्ष क्रमशः चुल्हाइ प्रसाद यादव, जगदिश गुप्ता, गोधन हरिजन र दयाशंकर त्रिपाठी, सरोकारवाला फोरककी सदस्य मन्जु चौधरी, इलाका प्रहरी कार्यालय महेशपुरका बासुदेव ओली, सामुदायिक रेडियो परासीका प्रवन्ध निर्देशक मेघराज गौतम, सुनवल सामुदायिक विकास केन्द्रका कृष्ण पाण्डे लगायतले बोल्नु भएको केन्द्रका सामाजिक परिचालक अशोक गुप्ताले जानकारी दिनु भयो ।
