परासी । २५ औं अन्तर्राष्ट्रिय युवा दिवसको अवसरमा पाल्हीनन्दनका युवा युवतीहरुले युवा, शान्ति र समृद्धि विषयमा बहस गरेका छन् । सोमबार पाल्हीनन्दनमा युवा दिवस मनाउन भेला भएका युवायुवतीहरुले दिगो विकासको लक्ष्य प्राप्ती गर्न राज्यका विभिन्न निकायमा युवाको पहुँच बृद्धि गर्नु पर्ने कुरामा जोड दिएका थिए ।
युवा, शान्ति र समृद्धि विषयमा प्यानल बनाएर छलफल गरिएको थियो । छलफलका लागि गाउँपालिकाका अध्यक्ष बैजुप्रसाद गुप्ता, जिल्ला प्रहरी कार्यालय नवलपरासीका प्रहरी नायव उपरिक्षक रेशम बोहरा र सुनवल सामुदायिक विकास केन्द्रका सचिव जयराम वश्याल हुनुहुन्थ्यो भने कार्यक्रमको सहजिकरण पाल्हीनन्दनमा सञ्चालित लैङ्गिक समानता परियोजनाकी संयोजक ज्योतिसिंह रायले गर्नु भएको थियो ।
कार्यक्रममा पाल्हीनन्दनमा युवा र रोजगार, युवाहरुको उद्यमशिलता, लागू औषध दूर्वेशनको प्रभाव, शान्ति सुरक्षा र गाउँपालिकाले सञ्चालन गर्ने योजनामा युवाहरुको पहुँचका विषयमा सहभागीहरुले प्रश्न उठाएका थिए ।
सहभागीहरुको प्रश्नको जवाफ दिंदै गाउँपालिकाका अध्यक्ष गुप्ताले युवालक्षित कार्यक्रम सञ्चालन गरिएकोले गाउँपालिकाको विकास र समृद्धिमा युवाहरुको साथ र सहयोगको अपेक्षा गर्नु भएको छ । उहाँले युवाहरु सधै सकारात्मक भएर आफ्नो सुखद भविश्यकालागि तयार हुनु पर्नेमा जोड दिनु भयो । अध्यक्ष गुप्ताले युवाहरुकालागि प्रयाप्त सम्भावनाहरु भएकोले अनुशासनपूर्वक आफूलाई तयार पार्नु पर्ने बताउनु भयो ।
यस्तै प्रहरी नायव उपरिक्षक बोहराले शान्ति र सुव्यवस्था कायम गर्न विना वर्दिका प्रहरीको ठूलो भूमिका हुने भएकाले युवा वर्गले थप सचेत बन्नु पर्ने बताउनु भयो । उहाँले समाजमा शान्ति सुब्यवस्था स्थापना गर्न सबै पक्षले सकारात्मक योगदान गर्नु पर्नेमा जोड दिनु भयो ।
यस्तै सुनवल सामुदायिक विकास केन्द्रका सचिव बस्यालले युवाहरुलाई सीप र सृजनाले युक्त बनाउँदै स्वरोजगार बन्न उत्प्रेरणा जगाउनु पर्ने बताउनु भयो । स्थानीय पालिकाले सो को लागि युवा लक्षित कार्यक्रमहरु ल्याउनु पर्ने धारणा राख्नु भयो ।
कार्यक्रममा सामुदायिक मेलमिलाप तथा सम्बाद परियोजनाका कृष्ण पाण्डे, असल युवा समूहकी अध्यक्ष खुसबु शर्मा लगायतले युवा दिवसको अवसरमा युवा, शान्ति र संम्बृद्धि विषयमा चर्चा गर्नु भएको थियो ।
कार्यक्रममा पाल्हीनन्दनमा गठीत ६ वटा युवा समूहका झण्डै १ सय ५० जना युवायुवतीहरु, गाउँपालिकाका ६ वटै वडाका अध्यक्ष एवं जनप्रतिनिधि लगायतको उपस्थिति रहेको सामजिक परिचालक अशोक गुप्ताले बताउनु भयो ।
कार्यक्रम सुनवल सामुदायिक विकास केन्द्र सुनवलको आयोजना, युनाइटेड मिसन टु नेपाल नवलपरासी क्लस्टरको सहयोग र पाल्हीनन्दन गाउँपालिकाको सहकार्यमा गरिएको हो ।
