परासी । सुनवल सामुदायिक विकास केन्द्र सुनवलले बुधवार पाल्हीनन्दन र प्रतापुरमा सञ्चालित ३ वटा परियोजनाको बार्षिक सामाजिक लेखापरिक्षण सम्पन्न गरेको छ । संस्थाले आ.ब.२०८०।०८१ मा दुवै पालिकामा सञ्चालित परियोजनाको सामाजिक परिक्षण कार्य सम्पन्न गरेको हो ।
केन्द्रकी अध्यक्ष सपना अधिकारी थापाको अध्यक्षता र पाल्हीनन्दन गाउँपालिकाका अध्यक्ष बैजु प्रसाद गुप्ता दिपकको प्रमुख आतिथ्यमा कार्यक्रम गरिएको हो ।
कार्यक्रममा संस्थाले सञ्चालन गरेका लैङ्गिक समानता परियोजना, घरेलु हिंसा न्यूनिकरणका लागि सामुदायिक मेलमिलाप तथा संवाद परियोजना र अपाङ्गता समावेशी विकास परियोजनाको बार्षिक समिक्षा गरिएको छ । यस्तै संस्थाको संस्थागत सुशासन, आर्थिक र सामाजिक पक्ष, सञ्चालक तथा कर्मचारी संयन्त्र व्यवस्थापन जस्ता विषयमा संस्थाका सचिव जयराम वश्यालले प्रस्तुत गर्नु भएको थियो ।
संस्थाले तीन वटै परियोजनाबाट आ.ब.२०८०।०८१ मा २ करोड ६३ लाख २१ हजार २४ रुपैया खर्च गरेको छ । जसमा पाल्हीनन्दनको वडा नं. ५ र ६ मा सञ्चालित लैङ्गिक समानता परियोजना अन्तरर्गत ५६ लाख ५४ हजार ५८१, पाल्हीनन्दन १ देखि ४ नम्बर वडामा संचालित घरेलु हिंसा न्यूनिकरणका लागि सामुदायिक मेलमिलाप तथा संवाद परियोजनाको ५५ लाख ७ हजार १७५ र पाल्हीनन्दन र प्रतापपुरमा संचालित अपाङ्गता समावेसी विकास परियोजनामा १ करोड ५१ लाख ५९ हजार २६८ बजेट खर्च भएको हो ।
सामाजिक परिक्षण कार्यक्रममा संस्थालाई जनप्रतिनिधिहरुले विभिन्न सुझाव पनि दिएका छन् । कार्यक्रममा प्रमुख अतिथि समेत रहनु भएका गाउँपालिकाका अध्यक्ष बैजु प्रसाद गुप्ता दिपकले सामाजिक जागरणका साथै भौतिक निर्माणको क्षेत्रमा पनि काम गर्न संस्थालाई सुझाव दिनु भयो । अध्यक्ष गुप्ताले सुनवल सामुदायिक विकास केन्द्रले संचालन गरेका तीन वटै परियोजनाले समाजमा निकै प्रभाव पारेको भन्दै समुदायमा महिला तथा किशोर किशोरीहरुलाई आत्मनिर्भर बनाउन आयमूलक कार्यमा जोड दिन आग्रह गर्नु भयो ।
यस्तै प्रतापपुर गाउँपालिका अध्यक्ष उमेशचन्द्र यादवले प्रतापुर गाउँपालिकामा संचालित अपाङ्गता समावेशी विकास परियोजनाले पालिका भित्रका अपाङ्गसँग सम्बन्धी तथ्याङ्क संकलन गर्न सहयोग गरेको बताउनु भयो । उहाँले अपाङ्गता भएका व्यक्तिहरुलाई अवसरका साथै सीपमूलक कार्यक्रमहरु सञ्चालन गरेर आत्मनिर्भर वनाउनु पर्नेमा जोड दिनु भयो ।
कार्यक्रममा तीनैवटा परियोजनाका संयोजक क्रमशः ज्योतिसिंह राय, कृष्ण पाण्डे र श्याम ढुँगानाले परियोजनाको बार्षिक गतिविधि प्रस्तुत गर्नु भएको थियो ।
कार्यक्रममा प्रतापपुर गाउँपालिकाकी उपाध्यक्ष मानकुमारी चौधरी, पाल्हीनन्दन गाउँपालिका वडा नं. ३ का अध्यक्ष गोधन प्रसाद हरिजन, युनाइटेड मिसन टु नेपालका अर्जुन कुमार तामाङ्ग लगायतले बोल्दै सामाजिक परिक्षण संस्थाको शुशासनको महत्वपूर्ण कडि भएको बताएका छन् ।
आ.ब. २०८०।०८१ मा सञ्चालन भएका तीन वटै परियोजनाको सामाजिक लेखा परिक्षण सामुदायिक रेडियो परासी ९०.२ मेगाहर्जका प्रवन्ध निर्देशक मेघराज गौतमले गर्नु भएको संस्थाकी सामाजिक परिचालक राधा तिमिल्सीनाले नेपाली चेलीलाई जानकारी दिनु भयो ।
