परासी । मौसममा आएको परिवर्तनसँगै नवलपरासी जिल्लाका सातै वटा पालिकाहरुले आगलागी र हावाहुरीको जोखिमबाट बच्न आमनागरिकहरुलाई सचेत गराएका छन् । जिल्लाका रामग्राम, सुनवल, बर्दघाट नगरपालिका र पाल्हीनन्दन, सरावल, प्रतापपुर र सुस्ता गाउँपालिकाले सूचना नै जारी गरी गर्मी महिनामा डढेलो तथा आगलागीका घटनाबाट जोगिन विभिन्न सन्देश प्रवाह गरेका हुन् ।
गर्मी मौसममा सूर्यको किरण सीधै पृथ्वीमा पर्नाले तापक्रम ३० देखि ४५ डिग्री सेल्सियससम्म पुग्न सक्छ । जसले गर्दा कडा घामलाग्ने, कतिपय ठाउँमा तातो हावा (लू) चल्न पनि सक्छ । नदी, पोखरी, इनार वा धारा सुक्ने अवस्था आउँदा खानेपानीको संकट देखिन सक्छ ।
यस्तै वन क्षेत्रमा आगलागी हुने, सुख्खा मौसमका कारण धुलो र प्रदूषण बढ्न सक्ने हुँदा सचेत रहन सन्देश प्रवाह गरिएको रामग्राम नगरपालिकाका नगरप्रमुख धनपत यादवले बताउनु भयो । नगरप्रमुख यादवले नगरवासीहरुमा सावधानी अपनाएर आफू र आफ्नो परिवारलाई सुरक्षित राख्न नगरको विपद् व्यवस्थापन शाखा मार्फत आग्रह गर्नु भएको हो ।
यस्तै १३९ दशमलव १० वर्ग किलोमिटर क्षेत्रफल मध्ये ५९ प्रतिशत वन क्षेत्रले मात्र ओगटेको सुनवल नगरपालिकाले पनि वन क्षेत्रमा जथाभावी आगो नलगाउन, साना बालबालिकाले भेट्ने ठाउँमा लाईटर र सलाई जस्ता प्रज्जलनशील सामानहरु नराख्न अनुरोध गरेको छ । घरको संरचना बलियो बनाउन, हावाहुरी चल्नासाथ झ्याल ढोका बन्द गर्न, विद्युतीय उपकरणहरुको प्रयोग सुरक्षित गर्न सुनवल नगरपालिकाकी नगरप्रमुख बिमला अर्यालले नगरवासीमा अनुरोध गर्नु भएको हो ।
यस्तै १८० दशमलव ९६ वर्ग किलोमिटर क्षेत्रफल रहेको बर्दघाट नगरपालिकामा १०२ दशमलव ०२ प्रतिशत वन क्षेत्रले ओगटेको छ । नगरपालिकाले वन, सहरी र ग्रामीण क्षेत्रमा नागरिकहरुलाई सुचना नै जारी गरी गर्मी मौसममा हुनसक्ने आगलागीका घटनाबारे सचेत र सजग रहन आग्रह गरेकोछ । नगरपालिकाको दमकल र तालिम प्राप्त जनशक्ति आवश्यकता अनुसार पालिका भित्र र बाहिर पनि परिचालन गरिएको नगरप्रमुख शम्भुलाल श्रेष्ठले जानकारी दिनुभयो ।
यस्तै जिल्लाको सरालव गाउँपालिकाले पनि गर्मी बढेसँगै तातो हावा लू चल्ने भएकोले सचेत रहन र दैनिक जसो प्रशस्त पानी पिउन आग्रह गरेको छ । गाउँपालिकाले सूचना नै जारी गरी खेतबारीमा गहुँ काट्ने सिजन भएकोले गहुँ काटीसकेपछि गहुँको च्याख्ला नजलाउन अनुरोध गरेको छ । यदि अटेरी गरी आगलागीको घटना भएमा सम्बन्धित व्यक्तिलाई २५ हजारसम्म जरिवाना गर्न सकिने गाउँपालिकाका अध्यक्ष सुखाडिप्रसाद चौधरीले बताउनु भयो ।
यस्तै पाल्हीनन्दन, प्रतापपुर र सुस्ता गाउँपालिकाले पनि छुट्टाछुट्टै सूचना जारी गरी मौसम परिवर्तनसँगै तराई क्षेत्रमा हावाहुरी चल्ने र गर्मी बढेकाले सचेत रहन आग्रह गरेका छन् ।
पाल्हीनन्दन ६ पडरीमा गतबर्ष आगलागी हुँदा ठूलो क्षति भएको थियो । यस बर्ष कुनै पनि क्षतिका घटना हुन नदिन पालिकाहरुले सूचना प्रवाह गर्दै अनुगमनलाई पनि तिव्रता दिएका छन् । आपतकालिन सेवा लिन दमकल, एमबुलेन्स सेवा र प्रहरीमा सूचना गर्न टेलिफोन सेवालाई २४ घण्टा नै सूचारु राखिएको पालिका भित्रका विपद् व्यवस्थापन शाखाले जनाएका छन् ।
