रामग्राम नगरपालिकाका नगरप्रमुख धनपत यादवले आदिवासी जनजातिहरुको भाषा, धर्म, रितिरिवाज र पर्यटनको विकासका लागि रामग्राममा होम स्टे सञ्चालन गर्न लागिएको बताउनु भएको छ । नगरप्रमुख यादवले करिव २ करोडको लागतमा रामग्राम १४, प्रसावलका १३ वटा घरमा होम स्टे बनाउन लागेको जानकारी दिनु भयो । उहाँले सो कार्यकालागि चौधरी र मगर जातिलाई छनौट गरिएको बताउनुभयो ।
नगरप्रमुख यादवले रामग्राम नगरपालिका हामी सवै नगरवासीको साझा घर भएको बताउँदै, त्यसमा सबैको समान अधिकार छ, यसलाई सुन्दर बनाउने र सबै रमाउन सक्नु पर्छ, उहाँले चालु आर्थिक बर्षमा थप ३ अर्वको बजेट संघीय सरकारबाट प्राप्त भएकोले कृषि, शिक्षा, स्वास्थ्य, पर्यटन र पूर्वाधारमा जोड दिने बताउनु भयो ।
नेपाल आदिवासी जनजाती महासंघ रामग्राम नगर समन्वय परिषदले शनिबार परासीमा ३१ औं आदिवासी जनजाती दिवसको अवसरमा नगरप्रमुख यादवले उक्त कुरा व्यक्त गर्नु भएको हो । जनजाती महासंघ रामग्राम नगर परिषदका अध्यक्ष भवानीशंकर चौधरीको अध्यक्षता र नगरप्रमुख यादवको प्रमुख आतिथ्यमा कार्यक्रम गरिएको हो ।
कार्यक्रममा रामग्राम नगरपालिकाकी उपप्रमुख संझना चौधरी, नेपाल आदिवासी जनजाति महासंघ नवलपरासीका पूर्व अध्यक्ष देवराज चौधरी, नेवार समूदायको प्रतिनिधित्व गर्दै परासी क्याम्पसका प्राचार्य सुमनगोपाल आचार्य, गुरुङ्ग समुदायको प्रतिनिधित्व गर्दै गुरुङ्ग राष्ट्रिय परिषदका जिल्ला अध्यक्ष सोम गुरुङ्ग, महासंघका सल्लाहाकार देबेन्द्र चौधरी, कलाकार अशोक श्रेष्ठ, ब्याडमिन्टन प्रतियोगिताका प्रमुख रेफ्री मेघराज गौतम, बक्तृता प्रतियोगताका निर्णायक बेनीमाधव वश्याल लगायतले शुभकामना व्यक्त गर्नु भएको कार्यक्रम सञ्चालक एवं जनजाति महासंघकी डोल्मा चौधरीले जानकारी दिनुभयो ।
कार्यक्रमको अवसरमा विभिन्न प्रतियोगिताका विजयी प्रतिस्पर्धीहरुलाई पुरस्कृत गरिएको छ ।
