परासी । नेपाली महिलाहरूको पर्व हरितालिका तीज आज परेको छ । तीजको दर खाने दिन आज परेपनि केही दिन अघिदेखि नै तीजको रौनक गाउँघर र समाजमा देख्न सकिन्थ्यो ।
तिज पर्वको गरिमा (महत्व, गौरव र प्रतिष्ठा) धेरै गहन र सांस्कृतिक छ। नेपालमा विशेषगरी हिन्दू महिलाहरूले मनाउने यो पर्व धार्मिक, सामाजिक र सांस्कृतिक दृष्टिले महत्वपूर्ण मानिन्छ ।
भगवान् शिव र पार्वतीको आराधना गर्ने पर्व भएकाले तीजलाई भक्ति र श्रद्धाको प्रतीक पनि मानिन्छ । धार्मिक मान्यता अनुसार सत्ययुगमा पार्वतीले पनि भाद्र शुक्ल द्वितीयका दिन दरखाई भाद्र शुक्ल तृतीयामा व्रत बस्नु भएको रहेछ।
तीजको अवसरमा महिलाहरूले व्रत बस्दा परिवारको दीर्घायु, सौभाग्य र समृद्धिको कामना गर्दछन् । धर्म, आस्था र पूजा–पाठको माध्यमबाट आध्यात्मिक शान्ति प्राप्त हुने विश्वास पनि गरिन्छ ।
तीजका अवसरमा टाढा–टाढा बिहे भएर गएकी छोरी, दिदी–बहिनी, आमाहरू माइतीमा फर्किने अवसर हुने भएकाले तीजले दिदीबहिनी र आमाहरूको सुखद र सांस्कृतिक मिलन हुने गर्दछ ।
तीज पर्वलाई धार्मिक आस्था, पारिवारिक एकता, महिलाको सशक्तिकरण र सामाजिक सद्भावमा निहित रहेको विश्वास गर्न सकिन्छ।
आज दर खाने र भोलि व्रत बस्ने चलन छ । डाक्टर अरुणा उप्रेतीले आफ्नो शारीरिक र मानसिक अवस्था अनुसार तीजमा व्रत बस्ने गर्नुपर्छ भनेर महिलाहरुलाई सन्देश दिनुभएको छ।
आजको दिन प्रत्येक घरपरिवारमा पुरुषको पनि उत्तिकै जिम्मेवारी छ। आमाहरू, दिदीबहिनीहरू र आफ्ना श्रीमतीहरूप्रति माया, सम्मान र साथ दिनुपर्दछ।
