परासी। रामग्राम योग साधना केन्द्र, परासीले हरिबोधिनी एकादशीका दिन देउसी–भैलो कार्यक्रम आयोजना गरी यस वर्षको तिहार पर्वलाई बिदाइ गरेको छ।
केन्द्रकी अध्यक्ष यमकुमारी सुवेदीको अध्यक्षता तथा रामग्राम नगरपालिकाका नगर प्रमुख धनपत यादवको प्रमुख आतिथ्यतामा कार्यक्रम सम्पन्न भएको हो। कार्यक्रममा नगर प्रमुख यादवले योग साधानको भौतिक संरचना निर्माणमा आफू सकारात्मक भएको भन्दै व्यवस्थित योग साधाना केन्द्र स्थापना गर्न नगरपालिकाकाले सहयोग गर्ने बताउनु भयो ।
तिहारको अवसरमा आयोजित देउसी–भैलो कार्यक्रमबाट ९० हजार रुपैयाँभन्दा बढी रकम संकलन भएको केन्द्रकी अध्यक्ष सुवेदीले बताउनुभयो। संकलित रकम योग साधना केन्द्रको भौतिक संरचना निर्माण तथा व्यवस्थापनमा खर्च गरिने उहाँले जानकारी दिनुभयो।
‘योग गरौँ, स्वस्थ रहौँ’ भन्ने नाराका साथ सञ्चालन भइरहेको केन्द्रमा रामग्राम नगरपालिकाभित्रका ७० जनाभन्दा बढी व्यक्ति नियमित रूपमा योग साधनामा सहभागी हुँदै आएका छन्।
कार्यक्रममा उपप्रमुख संझाना चौधरी, कार्यपालिका सदस्य नानुकुमारी थापा, हरिओम फाउण्डेशनका प्रमुख ओमप्रकाश अग्रहरी, चन्द्रिका अग्रहरी, योग साधना केन्द्रका सल्लाहाकार प्रकाशचन्द्र श्रेष्ठ, राधिका पौडेल, ज्ञानेश्वर न्यौपाने, नमूना महिला समाजकी अध्यक्ष सरीता पौडेल, दिलिपकुमार गुप्ता लगायतले शुभकामना व्यक्त गर्नु भएको साधान केन्द्रकी सचिव गंगा सूर्यवंशीले नेपाली चेली अनलाईनलाई जानकारी दिनुभयो ।