परासी । सोमबारदेखि देशभर चर्किएको जेन-जी समर्थकहरूको आन्दोलन मङ्गलबार दोस्रो दिन पनि देशभरका विभिन्न शहरहरूमा उग्र रूप देखियो ।
नवलपरासीको सदरमुकाम परासीमा पनि नव युवाहरु (जेन-जी) बुद्धचोक परासीमा भेला भई प्रधानमन्त्री केपी शर्मा ओलीको पुत्ला दहन गर्दै आन्दोलन सुरु गरेका थिए। सयौँ युवाहरूले रामग्राम ३ स्थित नेपाली काङ्ग्रेसको क्षेत्रीय कार्यालय तोडफोड गरेका छन् भने नेकपा एमालेको रामग्राम ३ स्थित कार्यालयमा ढुङ्गामुढा गरेका छन्।
त्यस लगत्तै जिल्ला प्रशासन कार्यालय पुगेको जेन-जीका समूहहरूले केहीबेर ढुङ्गामुढा गरेका थिए । त्यस लगत्तै प्रहरीले सात राउण्ड अश्रु ग्यास प्रहार गरी आन्दोलनकारीलाई तितर बितर पारेको थियो।
परासीमा जेनजीहरूले भ्रष्टाचारको अन्त्यको माग गर्दै प्रधानमन्त्री केपी ओलीको राजीनामा मागेका थिए।सोमबार काठमाडौँमा भएको प्रदर्शनमा १९ जना प्रदर्शनकारीहरूको ज्यान गएसँगै मङ्गलबार त्यसको विरोधमा देशभरिका मुख्य शहरहरूमा आन्दोलनले चर्को रुप लिएको हो। कलिला बालबालिका र युवामाथि सरकारले गरेको बर्बर हमला र हत्याको चौतर्फी आलोचना र दुःख व्यक्त गरिएको छ।
यसैबीच आन्दोलनकारीहरूले नवलपरासी जिल्लाका विभिन्न पालिकाहरूमा तोडफोड र आगजनी गरेका छन्। जिल्ला समन्वय समिति नवलपरासी, रामग्राम नगरपालिका, सरावल गाउँपालिका, पाल्हीनन्दन गाउँपालिका, प्रतापपुर गाउँपालिका र सुनवल नगरपालिकामा आगजनी गरेका हुन् ।
आन्दोलनका बेला प्रदर्शनकारीहरूको तारो जिल्लाका राजनीतिक दलका नेताहरु पनि भए । जेन-जी हरूले विभिन्न पार्टीका नेता कार्यकर्ताहरूको घरमा पनि आगजनी गरेका छन्।
प्रदर्शनकारीहरूले सुनवल नगरपालिका की नगरप्रमुख बिमला अर्यालको घर, वर्दघाट नगरपालिकाका नगरप्रमुख शम्भुलाल श्रेष्ठ र उपप्रमुख रुद्र प्रकाश उपाध्यायको घर, नेपाली काङ्ग्रेसका प्रदेश सभासद् विश्व प्रेम पाठक, सभासद बैजनाथ जयसवाल, संघीय सांसद सरिता भुसाल खनालको घरमा र विनोद चौधरीको बर्दघाट स्थित सम्पर्क कार्यालयमा पनि आगजनी र तोडफोड गरेका छन्। यस्तै नेकपा एमालेका जिल्ला सचिव धीरज शर्मा बस्यालले बनाउँदै गरेको नयाँ घरमा पनि आगजनी भएको बताइएको छ। सुनवलमा एमाले नेता थानप्रसाद गैरे र नगरपालिकाका कर्मचारी रेशम शर्माको घरमा पनि आक्रमण भएको छ। दिनभर जसो आगजनी र तोडफोडका घटना भएपछि नवलपरासी प्रशासन द्वारा आज दिउँसो ३ बजेदेखि कर्फ्यु जारी गरेको थियो। कर्फ्यु लगाइएको भएपनि राति अबेरसम्म जिल्लाका विभिन्न पालिकाहरूमा आगजनीका घटना भइरहेको सामाजिक सञ्जालमा देख्न सकिन्थ्यो ।
प्रदर्शनकारीहरूले तोडफोड र आगजनी गरेपनि नवलपरासी प्रहरीले कुनै पनि हस्तक्षेप वा बल प्रयोग गरेको थिएन ।
