नेकपा एमाले नवलपरासी पार्टी कार्यालय आज शनिवार सरसफाई गरिएको छ। भदौ २४ गते जेनजीका नवयुवा पुस्ताले गरेको तोडफोडबाट पार्टीको परासी स्थित कार्यालयमा क्षति पुगेको थियो।
पार्टीका जिल्ला अध्यक्ष दिपेन्द्रकुमार अधिकारीको अगुवाइमा सरसफाई गरिएको हो। सो क्रममा २३ र २४ गते देशका विभिन्न जिल्लामा भएको हिंसात्मक घटनामा ज्यान गुमाउने व्यक्तिहरूलाई श्रद्धाञ्जली व्यक्त गर्दै घाइतेहरूको शीघ्र स्वास्थ्य लाभको कामना गरिएको छ ।
यस विषम परिस्थितिमा अध्यक्ष अधिकारीले जिल्लास्तरका पार्टीका नेता तथा कार्यकर्ताहरूलाई धैर्य धारण गर्न र थप एकताबद्ध भएर क्रियाशील बन्न अनुरोध गर्नुभएको छ।
जेनजी समूहले गरेको आन्दोलनमा नेकपा एमालेका नेता, जनप्रतिनिधि तथा कार्यकर्ताहरूलाई लक्षित गरी आक्रमण गरिएको अध्यक्ष अधिकारीले बताउनुभयो । उहाँले एमाले विरोधी तत्वहरूले पार्टी कार्यालय, जनप्रतिनिधिहरूका निजी निवास र पार्टीका नेता कार्यकर्ताहरूको घरलाई लक्षित गरेकोमा दुःख व्यक्त गर्नुभएको छ। उहाँले एमालेलाई लक्षित गरी गरीएको हिंसात्मक प्रदर्शनको निन्दा गर्नु भएको हो ।
सो क्रममा नेकपा एमालेका केन्द्रीय सल्लाहकार खिमलाल पोख्रेल, लुम्बिनी प्रदेश सदस्यहरू र जिल्ला कमिटीका केही सदस्यहरूले बोल्नुभएको थियो।
सो क्रममा नेकपा एमालेका जिल्ला अध्यक्ष अधिकारीको निजी निवास, सचिव एवं बर्दघाट नगरपालिकाका पूर्व नगर प्रमुख धीरज शर्मा बस्यालको बन्दै गरेको नयाँ भवन, पार्टी कि केन्द्रीय सदस्य एवं सुनवल नगरपालिकाकी नगर प्रमुख बिमला अर्यालको निजी निवास, सङ्घीय सांसद सरिता भुसाल खनालको निजी निवास, एमाले नेता थानप्रसाद गैरेको सुनवलस्थित निजी निवास, सुनवल नगर उपप्रमुख सूर्य दुवैको निजी निवासमा प्रदर्शनकारीहरूले आक्रमण गरी तोडफोड र आगजनी भएको हो ।
सदरमुकाम परासी पार्टी कार्यालयमा सरसफाई पछि पार्टीको झण्डा राखिएको कार्यालय सचिव रामचन्द्र भण्डारीले नेपाली चेली अनलाईनलाई जानकारी दिनु भयो ।
