चेली सम्वाददाता परासी । लुम्बिनी प्रदेशका स्वास्थ्यमन्त्री खेमबहादुर सारुले प्रदेशका १२ जिल्लाका स्वास्थ्य कार्यालय र मातहतका सवै कार्यालयबाट प्रवाह हुने स्वास्थ्य सेवा प्रभावकारी, शुसासनयुक्त बनाउन प्रतिवद्ध रहेको बताउनु भएको छ । उहाँले लुम्बिनी प्रदेश सरकारले स्वास्थ्य क्षेत्रमा शुसासन, जवाफदेहिता, गुणस्तरीय सेवा प्रवाहमा गंभिरतापूर्वक कामको थालनी गरेको बताउनु भएको छ ।
स्वास्थ्य कार्यालय नवलपरासीले गत आ.ब. २०८१।०८२ मा सम्पादित स्वास्थ्य कार्यक्रमहरुको समिक्षा र आगामी बर्षको योजना तर्जुमा गोष्ठीको सुनवलमा उद्घाटन गर्दै मन्त्री सारुले यस्तो बताउनु भएको हो ।
प्रदेश भित्रका स्वास्थ्यकर्मी र चिकित्सकहरुलाई ऐन, कानून र कार्यविधि भन्दा वाहिर गएर अवान्छित लाभ लिन बर्जित गरेको बताउँदै, तोकिएको अस्पतालमा भन्दा वाहेक अन्यत्र चिकित्सकीय अभ्यास अनुमति विना नगर्न निर्देशन गरिएको मन्त्री सारुले बताउनु भयो ।
यस्तै, लुम्बिनी प्रदेशका साँसद बैजनाथ कलवारले जिल्लाको एकमात्र जिल्ला अस्पताल पृथ्वीचन्द्र अस्पतालको सेवा प्रवाहलाई थप प्रभावकारी बनाउनु पर्नेमा जोडदिनु भएको छ । साँसद कलवारले अस्पतालको सुविधासम्पन्न भौतिक संरचना बने पनि चिकित्सककालागि आवासको सुविधा दिन नसकिएको बताउनु भयो । उहाँले प्रदेश सरकारले आवासको व्यवस्था मिलाउन माग गर्नु भयो । उहाँले अस्पतालमा सुविधा सम्पन्न आइसियुको व्यवस्था हुनु पर्नेमा जोड दिनु भयो ।
कार्यक्रममा लुम्बिनी प्रदेश सभा साँसद विश्वप्रेम पाठकले जिल्लामा जहाँसुकै वर्थिङ्ग सेन्टर खोल्ने भन्दा पनि संचालनमै रहेका बर्थिङ्ग सेन्टरलाई सुविधा सम्पन्न बनाउन पहल गर्नु पर्ने बताउनु भयो ।
जिल्ला समन्वय समिति नवलपरासीका प्रमुख भगौती यादव रुदलको अध्यक्षतामा भएको बार्षिक समिक्षा गोष्ठीमा सुनवल नगरपालिकाकी नगरप्रमुख बिमला अर्याल, स्वास्थ्य कार्यालय नवलपरासीका प्रमुख अंगदबहादुर शाही लगायतले शुभकामना व्यक्त गर्नु भएकोे स्वास्थ्य कार्यालयका वरिष्ठ मलेरिया इनिस्पेक्टर देविलाल पौडेलले जानकारी दिनुभयो ।
बार्षिक समिक्षा कार्यक्रम आज र भोलि बिहिवार दुईदिनसम्म सञ्चालन हुदैछ । कार्यक्रममा स्वास्थ्य कार्यालय नवलपरासी, जिल्लाका सातैवटा पालिकाका स्वास्थ्य शाखाहरु, जिल्लाको स्वास्थ्य क्षेत्रमा कार्यरत ११ वटा विकास साझेदार संघसंस्थाहरुको गत आर्थिक बर्षमा सम्पादित कार्यक्रमको समिक्षा र आगामी बर्षको योजना तर्जुमा गर्न लागिएको स्वास्थ्य प्रमुख शाहीले जानकारी दिनुभयो ।
