परासी । सरावल गाउँपालिकाले साेमबार १७ औं गाउँ अधिबेशन सम्पन्न गरेको छ । गाउँपालिकाका अध्यक्ष सुखाडिप्रसाद चौधरीको अध्यक्षतामा भएको गाउँ अधिबेशनले एक वटा विधेयक पनि पास गरेको छ । गाउँ अधिबेशनले आर्थिक कार्यविधि तथा वित्तिय उत्तरदायित्व विद्येयक २०८२ सर्वसम्मत पास गरेको हो ।
गाउँ अधिबेशनमा बिनियोजन ऐन र आर्थिक ऐन संशोधन सम्बन्धी प्रस्ताव गाउँपालिकाकी उपाध्यक्ष वास्मती हरिजनले पेश गर्नुभयो । यस्तै संगठन तथा व्यवस्थापन सर्वेक्षणको प्रतिवेदन वडा नं. ३ का वडाध्यक्ष फिरङ्गीप्रसाद चौधरी र आर्थिक कार्यविधि तथा वित्तिय उत्तरदायित्व विधेयक २०८२ वडा नं. ४ का अध्यक्ष एवं नगरप्रवक्ता सुरेशप्रसाद यादवले प्रस्तुत गर्नु भएको हो । अध्यक्ष यादवले प्रस्तुत गर्नुभएको विधेयक सर्वसम्मत पास भएको छ ।
यसैबीच गाउँ अधिबेशनमा गाउँपालिकाका प्रमुख प्रशासकीय अधिकृत श्रीप्रसाद गौतमले चालु आर्थिक बर्ष २०८२।०८३ को मध्यावधि प्रगति प्रतिवेदन पेश गर्नु भएको छ ।
उहाँले संघीय सरकार, प्रदेश सरकार, राजश्व वाँडफाँड र आन्तरिक श्रोतबाट गाउँपालिकाले २४ करोड ८६ लाख ४८ हजार ६८८ आम्दानी गरी ४६.३१ प्रतिशत प्रगति हासिल गरेको बताउनु भयो । यस्तै खर्चतर्फ चालु र पुँजीगत गरी १३ करोड २५ लाख ३४ हजार २४४ रुपैया खर्च गरी २४.६८ प्रतिशत खर्च भएको बताउनु भयो ।
गाउँपालिकाले मध्यावधी अवधिमा १७ वटा उपभोक्ता समितिहरू गठन, १७ वटा योजना कार्यान्वयन गरेको छ । गाउँपालिकाले सेवा प्रवाह तर्फ ३५८ जनाको जन्म दर्ता, १३७ जनाको मृत्यू दर्ता, १५५ वटा विवाह र १५ वटा सम्बन्ध विच्छेदको घटना दर्ता गरेको प्रमुख प्रशासकीय अधिकृत गौतमले जानकारी दिनुभयो । यस्तै गाउँपालिकाले चालु आर्थिक बर्षको पहिलो त्रैमासिक अवधिमा ३ करोड ७६ लाख ५० हजार ६४८ सामाजिक सुरक्षा वापतको भत्ता वितरण गरेको छ ।
यस्तै सरावल गाउँपालिकामा यही अवधिमा ७ वटै स्वास्थ्य संस्थाहरूबाट १२ हजार ७३६ जनाले स्वास्थ्य सेवा लिएको बताइएको छ । जसमा गाउँघर क्लिनिकबाट २ हजार २४० जनाले, खोप क्लिनिकबाट १ हजार ८४८ र महिला स्वास्थ्य स्वयंसेविकाबाट १४ हजार ५२३ जनाले सेवा लिएका छन् भने मनरी र भुजहवाका दुई बर्थिङ सेन्टरबाट ७३ जनाले प्रसुति सेवा लिएको प्रमुख प्रशासकीय अधिकृत गौतमले जानकारी दिनुभयो ।
१७ औं गाउँ अधिबेशनमा बोल्ने सभासदहरूले कृषि उपजको व्यवस्थापन, स्थानीय श्रोत, साधन र जनशक्तिको अधिकतम प्रयोग तथा सेवा प्रवाहलाई थप प्रभावकारी बनाउन आग्रह गरेका छन् । (रेडियो परासी)
